قاراعاندىدا سۋ تاسقىنى سالدارىنان تۇرعىنداردى ەۆاكۋاتسيالاۋعا پويىز ءبولىندى، دەپ حابارلايدى "ادىرنا" ۇلتتىق پورتالى.
ۇلتتىق تاسىمالداۋشى سۋ تاسقىنىنا بايلانىستى قاراعاندى وبلىسىنىڭ تۇرعىندارىن ەۆاكۋاتسيالاپ جاتىر.
قاراعاندى وبلىسىنىڭ اقسۋ-ايۋلى كەنتىندە اۋا رايىنىڭ ناشارلاۋى مەن قاردىڭ قارقىندى ەرۋى شەرۋباي-نۇرا وزەنىنىڭ شەكتەن تىس تولۋى سالدارىنان «ەكاتەرينبۋرگ-الماتى» تاس جولىنىڭ ۋاقىتشا جابىلۋىنا اكەلدى. وسىعان بايلانىستى «جولاۋشىلار تاسىمالى» اق قاراعاندى وبلىسىنىڭ تۇرعىندارىن ەۆاكۋاتسيالاۋدى ۇيىمداستىرۋدا، - دەلىنگەن مالىمەتتە.
ەڭ العاشقى №8801/8802 «قاراعاندى-بالقاش-2» باعىتىندا پويىز قاراعاندىدان 30 ناۋرىز كۇنى ساعات 14:53-تە جونەلتىلگەن.
سونداي-اق كەلەسى 1 رەيسكە جولاۋشىلار پويىزدارىنا قوسىمشا ۆاگوندار تاعايىندالعان. «قاراعاندى-بالقاش-2» باعىتىنداعى №606 پويىز قاراعاندىدان 30 ناۋرىزدا ساعات 19:40-تا جونەلتىلىپ، 31 ناۋرىز كۇنى بالقاشقا ساعات 06:25-تە كەلەدى.
«بالقاش-2-قاراعاندى» باعىتىنداعى №605 پويىز 30 ناۋرىز كۇنى ساعات 22:50-دە بالقاشتان جونەلتىلىپ، 31 ناۋرىز كۇنى ساعات 8:20-دا قاراعاندىعا كەلەدى.
قوسىمشا ۆاگونداردىڭ كومەگىمەن سۋ باسقان ايماقتاردان 1200-دەن استام تۇرعىندى تاسىمالداۋ مۇمكىن بولعان. ال انىقتامالىق اقپارات العىسى كەلەتىندەر «1433» ءنومىرى بويىنشا حابارلاسا الادى.
ەسكە سالا كەتەيىك، وسىعان دەيىن ەلىمىزدىڭ 10 وبلىسىندا سۋ تاسقىنىنا بايلانىستى توتەنشە جاعداي جاريالانعانىن حابارلاعان ەدىك.
