اقتوبە وبلىسىندا 10-نان استام وزەن ارناسىنان اسقان، دەپ حابارلايدى "ادىرنا" ءتىلشىسى.
وبلىستا 753 تۇرعىن ءۇي، 10 الەۋمەتتىك نىسان مەن ساياجايداعى 99 ۇيگە سۋ كىرگەن.
وبلىستاعى ەلەك، جەم، تورعاي، ىرعىز، ويىل، قاراقوبدا، ۇلكەن قوبدا، تەمىر، تامدى، قاۋىلجىر، ور وزەندەرى كوتەرىلگەن. سۋ باسقان 5 اۋدان مەن وبلىس ورتالىعى اقتوبە قالاسىندا توتەنشە جاعداي جاريالاندى.
"187 اۋلا مەن 99 ساياجاي ءۇيى زاقىمداندى. سۋ تاسقىنىنا قارسى شارالارعا جەكە قۇرامنىڭ 3 مىڭنان استام قىزمەتكەرى تارتىلدى. ونىڭ ىشىندە ماڭعىستاۋ وبلىسىنىڭ 52 قىزمەتكەرى جانە توتەنشە جاعدايلار مينيسترلىگىنىڭ قولداۋىمەن الماتى قالاسىنان كەلگەن 20 قۇتقارۋشى بار. 647 تەحنيكادان بولەك، ىزدەستىرۋ-قۇتقارۋ جۇمىسىنا قورعانىس مينيسترلىگىنىڭ التى تىكۇشاعى جۇمىلدىرىلدى. سۋ تاسقىنى سالدارىنان 6908 ادام قاۋىپسىز ورىندارعا كوشىرىلدى", - دەپ حابارلادى اقتوبە وبلىسى اكىمىنىڭ ءباسپاسوز قىزمەتى.
دەگەنمەن ءالى دە ىرعىز اۋدانىنداعى 4 ەلدىمەكەندى سۋ باسۋ قاۋپى بار.
