توتەنشە جاعدايلار ۆيتسە-ءمينيسترى تاسقىننان زارداپ شەككەندەرگە ارنالعان باسپانانىڭ قايدا سالىناتىنىن ءمالىم ەتتى، دەپ حابارلايدى "ادىرنا" ءتىلشىسى.
ۆيتسە-مينيستر باۋىرجان سىزدىقوۆ تاسقىن سالدارىنان بۇلىنگەن ۇيلەردىڭ جاڭا ورنىن ارنايى كوميسسيالار انىقتايتىنىن ايتتى.
باق وكىلىنىڭ "جاڭا ۇيلەر قايدا سالىنادى؟ بۇرىنعى ورنىندا بوي كوتەرسە، ءبىر جىلدان كەيىن قايتادان سۋ المايتىنىنا كىم كەپىلدىك بەرەدى؟" دەگەن ساۋالىنا شەنەۋنىك ماسەلەنىڭ پىسىقتالىپ جاتقانىن حابارلادى
«ءسىز دۇرىس ايتىپ تۇرسىز. ءبىز ءار جاعدايدان ساباق الۋىمىز كەرەك. بۇگىنگى تاڭدا ۇكىمەت دەڭگەيىندە جۇمىس توبى قۇرىلعانىن بىلەسىز. قازىر اكىمدىكتەر ءوز دەڭگەيىندە دە وسىنداي كوميسسيالار قۇردى. ولار وقيعا ورىندارىن زەرتتەپ، تەكسەرەدى. ءبىر دە ءبىر ادام نازاردان تىس قالمايدى. وسى كوميسسيالار مەن جۇمىس توپتارى اقىلداسا وتىرىپ، ساراپتاي وتىرىپ جاڭا ۇيلەر قاي جەرگە سالىناتىنىن شەشەدى. ءبىزدىڭ پايىمداۋىمىز بويىنشا، ول ۇيلەر، ارينە، قاۋىپسىز تۇستاردا سالىنۋ كەرەك»، - دەدى باۋىرجان سىزدىقوۆ.
