مايقايىڭ-التىن كەن ورنىندا جوعالىپ كەتكەن ەكى قىزمەتكەردىڭ وتباسىنا بۇگىنگە دەيىن جالاقى تولەنىپ وتىر، دەپ حابارلايدى "ادىرنا" ءتىلشىسى Orda.kz-كە سىلتەپ.
الايدا وتباسى ولارعا اقشا ەمەس، مارقۇمداردىڭ مۇردەسىن تاۋىپ بەرۋدى سۇرايدى.
جوعالعان 36 جاستاعى قۇتقارۋشى ايدوس شايمەردەننىڭ ارتىندا اتا-اناسى، ايەلى مەن بەس بالاسى قالعان.
جوعالىپ كەتكەن ازاماتتىڭ اكەسى قايعىلى وقيعادان كەيىن ەكى رەت ينسۋلت العان. مارقۇمدى جوقتاپ استاناعا ونىڭ وتباسى مەن تۋىستارى كەلگەن.
ايدوس شايمەردەننىڭ جەتى جاسار ۇلى ەرسۇلتان دا استاناعا كەلگەن. بالانىڭ ايتۋىنشا ول اكەسىنىڭ استانانى كورسەتۋگە ۋادە بەرگەنىن ەسىنە ءتۇسىردى. جارىنان ايىرىلعان نۇسرۇلۋ شايمەردەن:
«كۇنىمىز بەن ءتۇنىمىز جىلاۋمەن وتەدى. قارت اكەسى ينسۋلت العان، ال اناسىنىڭ قان قىسىمى كوتەرىلگەن. جالعىز ۇلى جوق. ونى دۇرىستاپ جەرلەي دە المادىق قوي»، – دەپ جىلايدى.
4 قاڭتار كۇنى اۆتوبۋس اپاتىنان ەكى ادامنىڭ دەنەسى تابىلدى. الايدا قۇتقارۋشى ايدوس شايمەردەن مەن قۇتقارۋ جاساعىنىڭ جۇرگىزۋشىسى ايىپ تىلەۋبەرگەنوۆ مۇردەلەرى ءالى تابىلماعان.
وكىنىشكە وراي، جەردىڭ وپىرىلىپ قالۋ قاۋپىنە بايلانىستى مارقۇمداردىڭ دەنەسىن ىزدەۋ جۇمىستارى توقتاتىلعان.
ىزدەستىرۋ جۇمىستارىن جالعاستىرۋ ءۇشىن ايدوس شايمەردەننىڭ تۋىستارى وبلىستىق پروكۋراتۋراعا حابار بەرگەن. الايدا ول جاقتاعىلار سوتقا ارىز جازۋعا نەمەسە ودان ءارى تاۋ-كەن جۇمىستارىنىڭ قاۋىپسىزدىگىن قامتاماسىز ەتۋ شارالارى قابىلدانعانشا كۇتۋگە كەڭەس بەرگەن كورىنەدى.
