1 ءساۋىر كۇنى قازاقستان پرەزيدەنتى قاسىم-جومارت توقاەۆ رەسپۋبليكالىق شتاب وتىرىسىندا جەرگىلىكتى كاسىپكەرلەر مەن ءىرى كومپانيالارعا سۋ تاسقىنى سالدارىنان زارداپ شەككەن ازاماتتارعا كومەك كورسەتۋگە شاقىردى.
«وتاندىق بيزنەستىڭ بارلىق وكىلدەرىن وسى جاۋاپتى ساتتە شەتتە قالماۋعا جانە ادامدارعا كومەك قولىن سوزۋعا شاقىرامىن. تابيعي اپاتتان زارداپ شەككەن بارلىق تۇرعىندار مەن وڭىرلەرگە بارىنشا قولداۋ كورسەتۋ قاجەت. بۇگىندە بۇل ءبارىمىز ءۇشىن ورتاق مىندەت»، - دەدى مەملەكەت باسشىسى.
وسى ورايدا Maqsut Narikbayev University مەملەكەت باسشىسىنىڭ باستاماسىن قولداپ، قيىن جاعدايعا تاپ بولعاندارعا تىكەلەي كومەك كورسەتۋ تۋرالى شەشىم قابىلدادى.
ءوزىنىڭ باستى ميسسياسى – قوعامعا قىزمەت ەتۋدى نەگىزگە الا وتىرىپ، ۋنيۆەرسيتەت بۇل ۇندەۋگە بەلسەندى اتسالىسىپ، تابيعي اپاتتان زارداپ شەككەندەرگە ماتەريالدىق جانە قارجىلىق كومەك كورسەتتى.
قازىرگى ۋاقىتتا ۋنيۆەرسيتەت سۋ تاسقىنىنان زارداپ شەككەندەرگە ارنالعان قايىرىمدىلىق قورلارىنا قوماقتى قاراجات ءبولدى. MNU ستۋدەنتتەرى قايىرىمدىلىق جارمەڭكەسىن ۇيىمداستىرىپ، ەۇۋ-مەن بىرلەسىپ قوستاناي جانە اتىراۋ وڭىرلەرىنە گۋمانيتارلىق كومەك جىبەردى. سونداي-اق ۋنيۆەرسيتەت سۋ تاسقىنىنان زارداپ شەككەن ستۋدەنتتەردى وقىتۋ ءۇشىن 10 گرانت بولۋگە نيەتتى. سونىمەن قاتار، گرانت يەگەرلەرىنە قوسىمشا قولداۋ كورسەتۋ ماقساتىندا ستۋدەنتەر ۇيىنەن كەزەكتەن تىس ورىن ءبولۋ تۋرالى ۇسىنىستى العا تارتتى. ايتا كەتۋ كەرەك، سۋ تاسقىنىنان زارداپ شەككەن ايماقتارعا گۋمانيتارلىق كومەك جيناۋ جالعاساتىن بولادى.
