جايىق وزەنىنىڭ سۋ دەڭگەيى قاۋىپتى دەڭگەيدەن 7 سم استى، بىراق ورالعا قاۋىپ ءتونىپ تۇرعان جوق. بۇل تۋرالى باتىس قازاقستان وبلىسى توتەنشە جاعدايلار دەپارتامەنتى وڭىردەگى سۋ تاسقىنى جونىندە اقپارات بەردى، دەپ حابارلايدى “ادىرنا” ۇلتتىق پورتالى.
بقو تجد باستىعىنىڭ مىندەتىن اتقارۋشى رۋسلان قاسىباەۆتىڭ ايتۋىنشا، ساياجاي تۇرعىندارىن الدىن الا ەسكەرتۋ جۇمىستارى جۇرگىزىلىپ، بارلىعى قاۋىپسىز جەرگە شىعارىلدى، دەلىنگەن ورتالىق كوممۋنيكاتسيالار قىزمەتىنىڭ Telegram-داعى ارناسىندا جاريالانعان اقپاراتتا.
«سۋ كوتەرىلگەندە ساياجايدى كۇزەتەمىز دەپ قايتىپ بارعان ازاماتتار بار ەكەنى انىقتالدى. قۇتقارۋ جۇمىستارى جۇرگىزىلىپ، سۋ باسقان ساياجايلاردان ادامدار شىعارىلدى. ستەنوۆيك، 1, 2, 3-ساياجايلاردا سۋ دەڭگەيى كوتەرىلىپ، اۆاريالىق قۇتقارۋ جۇمىستارى جۇرگىزىلىپ جاتىر. 1 تىكۇشاق، 10 قايىق، جەكە قۇرامنان 230 جۋىق ادام تارتىلدى. وسى جۇمىستاردىڭ ارقاسىندا ورال قالاسىنا قاۋىپ جوق»، - دەدى سپيكەر وكق الاڭىندا وتكەن بريفينگتە.
بۇل رەتتە باتىس قازاقستان وبلىسى اكىمىنىڭ ورىنباسارى قاليار ايتمۇحامبەتوۆ ەۆاكۋاتسيالاۋدان باس تارتقان ازاماتتار ءماجبۇرلى تۇردە ەۆاكۋاتسيالاناتىنىن اتاپ ءوتتى.
«10 ەۆاكۋاتسيالىق پۋنكتە 2360 ادام ورنالاسقان، ءالى 2786 ادامعا ورىن بار. وندا بارلىق جاعداي جاسالعان»، - دەدى سپيكەر.
