قاراعاندىنىڭ ورتالىق مادەنيەت جانە دەمالىس ساياباعىندا قۇستارعا ارنالىپ جاڭا 100 ۇيا سالىندى. بۇل يگى شاراعا ەرىكتىلەر مەن ارداگەرلەر، دەپۋتاتتار جانە بەلسەندى تۇرعىندار قاتىستى.
– ءبىز قازىر ءوز قالامىز بەن بۇكىل ەل بويىنشا ءوتىپ جاتقان ەكولوگيالىق اكتسيانى قولداۋعا شەشىم قابىلدادىق. قالامىزدا قۇستار ءان ايتىپ، شاھارىمىز جايلى جانە ادەمى بولعانىن قالايمىز. بۇل بالالار تابيعاتتى ساقتاۋ كەرەك ەكەنىن ءتۇسىنۋى ءۇشىن قاجەت. قۇستارعا ارنالعان ۇياشىقتاردى بالالار ءوز قولدارىمەن جاسادى، بۇعان ءتىپتى ءبىرىنشى سىنىپ وقۋشىلارى دا قاتىستى. كەيبىرەۋلەرىنە اتا-انالار كومەكتەستى، - دەيدى مارتبەك مامراەۆ اتىنداعى مەكتەپ-ينتەرناتىنىڭ بيولوگيا ءپانىنىڭ مۇعالىمى ايجان وسپانوۆا.
№ 2 ليتسەيدىڭ 5-سىنىپ وقۋشىسى ازاليا قادىروۆا ەرەكشە قۇس ۇياسىن جاساپتى.
- شاڭىراق تۇرىندەگى قۇس ۇياسىن جاسادىم. ونى قۇستارعا ادەمى جانە جايلى بولۋ ءۇشىن جاساندى گۇلدەرمەن بەزەندىردىم. مەن ءبارىن ءوزىم جاسادىم، انام تەك قالاي جاقسىراق جاساۋ كەرەتىگىن ايتتى. مەن قۇستارعا ۇنايتىنىنا سەنىمدىمىن، - دەيدى ازاليا.
قاراعاندىدا قۇستار مەن جانۋارلار ءۇشىن قولايلى ورتا قۇرۋدىڭ ماڭىزدىلىعىن قالالىق ءماسليحات دەپۋتاتى ايدوس ەسجانوۆ تا اتاپ ءوتتى. ول سونداي-اق ورناتىلعان قۇس ۇيالارى تابيعاتتى ايالايتىنىمىزدىڭ بەلگىسى عانا ەمەس، سونىمەن قاتار ەكولوگيالىق تەپە-تەڭدىكتى ساقتاۋعا كومەكتەسەتىن، قۇستاردى قالامىزعا كوپتەپ تارتۋعا جاقسى ءتاسىل بولادى دەگەن پىكىر ءبىلدىردى.
اكتسيانى ۇيىمداستىرۋشىلار قاتارىندا قاراعاندى جاستار رەسۋرستىق ورتالىعى دا بار.
– ءبىزدىڭ اكتسياعا 150-گە جۋىق ادام قاتىسادى: كىشكەنتاي بالالار دا، جوعارى سىنىپ وقۋشىلارى دا. ماقسات - قورشاعان ورتاعا قامقورلىق جاساۋ. ورتالىق ساياباقتا قۇستارعا ىڭعايلى بولۋ ءۇشىن جۇزگە جۋىق قۇس ۇياشىعى ءىلىندى، – دەيدى قاراعاندى جاستار رەسۋرستىق ورتالىعىنىڭ ديرەكتورى ياكۋب دجامالوۆ.
قۇستارعا ارنالعان ۇيالار ساياباقتاعى ءۇشىنشى كولدىڭ جانىندا ءىلىندى.
قالادا بارلىعى 1000 قۇس ءۇيى ورناتىلعان.
جوبا "تازا قازاقستان" ەكولوگيالىق اكتسياسى اياسىنداعى "جاسىل ايماق" اپتالىعىندا جۇزەگە اسىرىلىپ وتىر.
