"تازا قازاقستان" رەسپۋبليكالىق ەكولوگيالىق اكتسياسى اياسىندا تەمىرتاۋدا سەنبىلىككە مەتاللۋرگتەر جانە يندۋستريالدى ۋنيۆەرسيتەتتىڭ ستۋدەنتتەرى شىقتى. ولار وزدەرىنە بەكىتىلگەن اۋماقتى قوقىستاردان تازارتىپ، قۋراپ قالعان بۇتاقتاردى كەسىپ، اعاشتاردى اكتەدى.
ەكولوگيالىق اكتسيا ەكى ۇرپاقتى – جۇمىس ىستەپ جۇرگەن مەتاللۋرگتەر مەن مەتاللۋرگيا ونەركاسىبىنىڭ بولاشاق قىزمەتكەرلەرىنىڭ باسىن بىرىكتىردى. ەڭبەك ۇجىمىمەن بىرگە بەكىتىلگەن اۋماقتى جيناۋعا مەتاللۋرگيا كومبيناتىنىڭ باسشىلىعى دا شىقتى.
– "تازا ولكە" اكتسياسىنىڭ ءبىرىنشى اپتاسىندا زاۋىتقا ىرگەلەس اۋماق تازارتىلدى. بۇگىن ءبىز اعاشتاردى كەسۋ، اكتەۋ جۇمىستارىن جۇرگىزىپ جاتىرمىز. ءبىز ءۇشىن تۋعان قالامىزدىڭ تازا جانە جايلى بولۋى وتە ماڭىزدى، – دەدى كومپانيانىڭ باس ديرەكتورىنىڭ ورىنباسارى ەۆگەني حيتسكو. 
اكتسياعا قاتىسۋشىلار قالانىڭ ەڭ ۇلكەن ەكى كوشەسىن – رەسپۋبليكا داڭعىلى مەن قاراعاندى كوشەسىن قامتىدى.
"تازا قازاقستان" رەسپۋبليكالىق ەكولوگيالىق اكتسياسى باستالعاننان بەرى سەنبىلىكتەرمەن كومپانيانىڭ زاۋىت باسقارماسىنا تيەسىلى اۋماقتار، رەسپۋبليكا داڭعىلى، تەمىرتاۋ قالاسى قاراعاندى كوشەسى قامتىلدى. اكتسياعا كومپانيانىڭ بارلىق بولىمشەلەرى – 2000-نان استام قىزمەتكەر قاتىستى، 100-دەن استام تەحنيكا جۇمىلدىرىلدى.
سونىمەن قاتار، "تازا قازاقستان" اكتسياسى باستالعاننان بەرى تەمىرتاۋدا سەنبىلىكتەرگە 3,5 مىڭ ادام قاتىستى. ولاردىڭ كۇشىمەن قالا كوشەلەرىنەن 5 مىڭ تونناعا جۋىق قوقىس شىعارىلدى.
