تاجىكستان ىشكى ىستەر مينيسترلىگى كورىپكەلدەر مەن زاڭسىز ءدىني وقىتۋلارعا قاتىستى ءتارتىپتى قاتاڭداتاتىنىن جاريالادى، دەپ حابارلايدى "ادىرنا" ۇلتتىق پورتالى. مالىمدەمە تاجىكستان ءىىم رەسمي سايتىندا جاريالاندى.
"تاجىكستان رەسپۋبليكاسىنىڭ اۋماعىندا تاجىكستان رەسپۋبليكاسىنىڭ «داستۇرلەردى، مەرەكەلەر مەن جورالعىلاردى رەتكە كەلتىرۋ تۋرالى»، «تاجىكستاننىڭ جاۋاپكەرشىلىگى تۋرالى» زاڭدارىنىڭ تالاپتارىن ساقتاماۋمەن بايلانىستى بۇزۋشىلىقتاردىڭ الدىن الۋ بويىنشا تەكسەرۋ-پروفيلاكتيكالىق جۇمىستارى جالعاسۋدا. بۇل تۇستا "اتا-انالاردىڭ بالالارىن وقىتۋ مەن تاربيەلەۋ تۋرالى»، «ار-وجدان بوستاندىعى جانە ءدىني بىرلەستىكتەر تۋرالى» جانە ت.ب. شارالارى اتقارىلۋدا" دەلىنگەن مالىمدەمەدە.
سونداي-اق، باقسىلىقپەن، زاڭسىز ءدىني ىلىممەن اينالىساتىن تۇلعالارعا، بويتۇمار مەن ءتۇرلى بەلگىلەر تاراتاتىن مولدالارعا باقىلاۋ جۇرگىزىلىپ، مۇنداي تۇلعالارعا بىرىڭعاي تىركەۋ ءتىزىلىمى ەنگىزىلگەنى اتالدى.
"وسىنداي قۇقىق بۇزۋشىلىقتارعا بايلانىستى تاجىكستان رەسپۋبليكاسىنىڭ زاڭناماسىنا قىلمىستىق جانە اكىمشىلىك جاۋاپكەرشىلىكتى كۇشەيتۋ ماسەلەلەرى بويىنشا وزگەرىستەر مەن تولىقتىرۋلار ەنگىزىلۋدە.
الاياقتىقپەن (باقسىلىق، كورىپكەلدىك، بويتۇمارلار مەن تۇمارلار تاراتۋ، زاڭسىز ءدىني ۋاعىزدار جۇرگىزۋ) ارقىلى كۇن كورەتىن تۇلعالار 6 ايعا دەيىن ءماجبۇرلى جۇمىسقا تارتىلادى" دەلىنگەن مينيسترلىك حابارلاماسىندا.
