«AMANAT» پارتياسى «جاستار رۋحى» جاستار قاناتىنىڭ 4 مىڭعا جۋىق ۆولونتەرى «تازا قازاقستان» جالپىۇلتتىق اكتسياسىنا قوسىلدى. ولار سۋ تاسقىنىنان زارداپ شەككەن تۇرعىنداردىڭ ۇيلەرىن رەتكە كەلتىرۋگە كومەكتەسۋدە.
ەلىمىزدە مەملەكەت باسشىسى قاسىم-جومارت توقاەۆتىڭ باستاماسىمەن «تازا قازاقستان» جالپىۇلتتىق اكتسياسى قولعا الىندى. ونىڭ اياسىندا كوشە تازالاۋ، ەلدى مەكەندەر اۋماعىن كوگالداندىرۋ جانە اباتتاندىرۋ، سۋ تاسقىنىنان كەيىن قالالار مەن اۋىلداردى قالپىنا كەلتىرۋ جۇمىسى جۇرگىزىلىپ جاتىر.
وسىلايشا، «جاستار رۋحىنىڭ» 4 مىڭعا جۋىق ۆولونتەرى سۋ تاسقىنىنان زارداپ شەككەن تۇرعىنداردىڭ ۇيلەرىن رەتكە كەلتىرۋگە كومەكتەسۋدە. ۆولونتەرلەر تازالىق جۇمىسىن جۇرگىزىپ، جيھازدار مەن زاتتاردى كەپتىرۋدە. سونىمەن قاتار ءۇي ماڭىنداعى ۇيىندىلەردى تازارتىپ جاتىر.
ماسەلەن، اقمولا وبلىسى يۆانكوۆكا كەنتىندە 150-دەن استام ادام تۇرىپ جاتقان 67 ءۇيدى سۋ باستى. ەرىكتىلەر ۇيلەردەگى جوندەۋگە كەلەتىن تەحنيكا مەن تۇرمىستىق زاتتاردى اۋلاعا شىعارۋدا.
«بۇگىندە سۋ بىرتىندەپ ازايىپ، تۇرعىندار ۇيلەرىنە ورالۋدا. سوندىقتان ءبىز ءبىرىنشى كەزەكتە زەينەتكەرلەر مەن جالعىزباستى انالارعا كومەك كورسەتۋگە كەلدىك. وسىنداي جۇمىس اباي، قوستاناي جانە اقتوبە وبلىستارىندا باستاۋ الدى. سىن ساعاتتا بىرلىگىمىز بەن ىنتىماعىمىزدى كورسەتۋ، زارداپ شەككەن وتباسىلارعا كومەك قولىن سوزۋ ماڭىزدى. ادامدار قيىندىقپەن جالعىز كۇرەسپەۋى كەرەك»، – دەدى «جاستار رۋحى» جاستار قاناتىنىڭ توراعاسى اقەركە يسكاندەروۆا.
پارتيالىقتار سۋ تاسقىنىنان زارداپ شەككەن اقتوبە وبلىسىنىڭ تۇرعىندارىنا دا كومەك كورسەتۋدە. جاستار قاناتىنىڭ بەلسەندىلەرى سۋ باسقان قوبدا اۋىل تۇرعىندارىنا كومەككە كەلدى. ايتا كەتەيىك، قوبدا اۋدانىندا بارلىعى 200-دەن استام ءۇي سۋ استىندا قالدى. زارداپ شەككەن تۇرعىندارعا شامامەن 370 مىڭ تەڭگە كولەمىندە بىرجولعى جاردەماقى تولەنۋدە. ءۇيى قالپىنا كەلتىرۋگە جارامايتىن تۇرعىندارعا جاڭا باسپانا سالىنادى. ءۇي تۇرعىزىلاتىن ۋچاسكەلەر انىقتالىپ، قۇرىلىس ماتەريالدارىن جەتكىزۋ جۇمىسى باستالدى.
بۇل رەتتە، «AMANAT» پارتياسىنىڭ بەلسەندىلەرى مەن «جاستار رۋحىنىڭ» ۆولونتەرلەرى سۋ تاسقىنىنان زارداپ شەككەن وبلىستاردا عانا جۇمىس ىستەۋمەن شەكتەلمەي، وزگە وڭىرلەردە دە «تازا قازاقستان» ناۋقانىنا قوسىلىپ جاتىر.
ماسەلەن، قىزىلوردادا پارتيا مۇشەلەرى قالالىق «ەڭبەك اللەياسىن» قوقىستان تازارتىپ، اعاشتاردى اكتەدى. ۇلىتاۋ وبلىسىندا بەلسەندىلەر جوشى حاننىڭ تاريحي-مادەني كەشەنى اۋماعىندا تازالىق جۇمىسىن جۇرگىزدى. شىمكەنتتە جاس رۋحتاستار بادام وزەنىنىڭ جاعاسىندا سەنبىلىك وتكىزسە، الماتىدا «ALA» باعىنا 300 اعاش ەكتى. استانا قالاسىنداعى «جاستار رۋحىنىڭ» بەلسەندىلەرى دە يگى ىستەن شەتتە قالمادى. ولار «اتاتۇرىك» ساياباعىندا تازالىق جۇمىسىن ۇيىمداستىردى. ال اباي وبلىسىندا پارتيالىقتار ۆوسكرەسەنوۆكا اۋىلىنىڭ جانىنداعى ورمان القابىنا قاراعاي كوشەتتەرىن وتىرعىزۋ جۇمىسىنا اتسالىستى.
