مەملەكەت باسشىسى قاسىم-جومارت توقاەۆ قالالىق سەنبىلىككە قاتىستى، - دەپ حابارلايدى “ادىرنا” ۇلتتىق پورتالى.
«تازا قازاقستان» رەسپۋبليكالىق ەكولوگيالىق اكتسياسى اياسىندا مەملەكەت باسشىسى قاسىم-جومارت توقاەۆ ەلوردانىڭ ۇلىتاۋ اللەياسىندا وتكەن قالالىق سەنبىلىككە جانە اعاش وتىرعىزۋعا قاتىستى.
بۇل اكتسياعا ۆولونتەرلار، «جاستار» اسسامبلەياسى ۇيىمىنىڭ وكىلدەرى، بەلسەندى عىلىمي، شىعارماشىل، سپورتشى جاستار، الداعى V دۇنيەجۇزىلىك كوشپەندىلەر ويىندارىنا قاتىسۋشىلار، پرەزيدەنتتىك جاستار كادرلىق رەزەرۆىنىڭ مۇشەلەرى دە قولداۋ كورسەتتى.
“شىن مانىندە، ەلىمىزدى كوگالداندىرۋ، اباتتاندىرۋ – ۇلكەن مەملەكەتتىك ماڭىزى بار ءىس. بۇل بۇگىن شىعىپ، ەرتەڭ ۇمىتىپ كەتەتىن بىررەتتىك ناۋقان ەمەس. اتالعان جۇمىس تۇراقتى تۇردە جۇرگىزىلەدى. تۋعان جەرىمىزدى تازا ۇستاۋىمىز كەرەك. بۇل – جالپىۇلتتىق ماسەلە. قازاقستانىمىز تازا بولۋى قاجەت. لاس ەلگە قوناق رەتىندە، ينۆەستور رەتىندە ەشكىم كەلمەيدى. بىراق، ەڭ الدىمەن، قازاقستاننىڭ تازا، كورىكتى بولعانى ءبىز ءۇشىن، ياعني حالىق ءۇشىن كەرەك. بۇل كۇندەلىكتى ءومىر سالتىنا اينالۋى قاجەت. سونداي-اق بۇل جۇمىس ەلوردا جانە ءىرى قالالاردا عانا ەمەس، شاعىن قالالاردا، اۋداندار مەن اۋىلداردا دا ۇدايى ۇيىمداستىرىلادى. بۇكىل قازاقستاندى تازا ۇستاۋ وزىمىزگە، جاستارعا بايلانىستى. مەن جاستارعا سەنەمىن. سوندىقتان جاستارعا زور ۇمىتپەن قارايمىن” ، – دەدى مەملەكەت باسشىسى.
قاسىم-جومارت توقاەۆ سونداي-اق بوتانيكالىق باقتى ارالاپ، جالپىقالالىق سەنبىلىككە قاتىسىپ جاتقان تۇرعىندار مەن ەلوردالىق كوممۋنالدىق كاسىپورىنداردىڭ قىزمەتكەرلەرىنە العىسىن ءبىلدىردى.
