مەملەكەت باسشىسى قاسىم-جومارت توقاەۆ الداعى جەكسەنبىدە وتەتىن جاڭا ءبىرپالاتالى قۇرىلتايدىڭ العاشقى سايلاۋى قارساڭىندا قازاقستاندىقتارعا ۇندەۋ جولدادى، دەپ حابارلايدى «ادىرنا» ءتىلشىسى.
پرەزيدەنت ناۋقاندى ەل تاعدىرىنا تىكەلەي اسەر ەتەتىن تاريحي وقيعا دەپ اتاپ، ونىڭ قازاقستاننىڭ ساياسي دامۋىنداعى جاڭا كەزەڭگە جول اشاتىنىن ايتتى.
«بۇل – ۇلت تاعدىرىنا تىكەلەي اسەر ەتەتىن تاريحي وقيعا. ەلىمىز سوڭعى جىلدارى اۋقىمدى رەفورمالاردى جۇزەگە اسىرىپ، جارقىن بولاشاققا باتىل قادام باسىپ كەلەدى. ءبىز بىرلىك پەن كەلىسىمنىڭ جانە ىنتىماقتىڭ ارقاسىندا ادىلەتتى قازاقستاندى قۇرۋ ىسىندە زور جەتىستىككە جەتتىك. حالىق كونستيتۋتسياسى كۇشىنە ەندى، ەلىمىزدىڭ دامۋ باعدارى وزگەردى. دەگەنمەن، اتقاراتىن جۇمىس ءالى دە كوپ.
بۇل سايلاۋ حالقىمىزدىڭ يگىلىگىنە قىزمەت ەتەتىن تىڭ رەفورمالارعا باستاۋ بولىپ، قازىرگى قازاقستان جىلناماسىنداعى جاڭا كەزەڭگە جول اشادى»،–دەدى ول.
قاسىم-جومارت توقاەۆ پارتيالاردىڭ سايلاۋعا جان-جاقتى دايىندالۋى ءۇشىن ونىڭ وتەتىن ۋاقىتى الدىن الا جاريالانعانىن ەسكە سالدى.
«قۇرىلتايدىڭ العاشقى سايلاۋ ناۋقانى مازمۇندى، اشىق، باسەكەگە تولى ءارى وركەنيەتتى سيپاتتا ءوتتى. ەل ازاماتتارىنىڭ سايلاۋ تۋرالى پىكىرى وسىنداي بولدى. بۇل سايلاۋ ەل تاريحىنداعى ەڭ تارتىستى ناۋقانداردىڭ ءبىرى رەتىندە ەستە قالاتىنى انىق. پارتيالار سايلاۋشىلارمەن كەزدەسۋ كەزىندە، سونداي-اق اقپاراتتاعى ۇگىت-ناسيحات، جالپىۇلتتىق تەلەدەباتتار، الەۋمەتتىك جەلىدەگى پىكىرتالاستار بارىسىندا ءوز باعدارلامالارىن كەڭىنەن ءارى دايەكتى تۇردە تانىستىردى.
ءبىر سوزبەن، ازاماتتارىمىز پارتيالاردىڭ ەل بولاشاعىنا قاتىستى ۇستانىمىن مۇقيات زەردەلەۋگە مۇمكىندىك الدى. ساياسي ۇيىمداردىڭ ەكونوميكادان باستاپ مادەنيەت سالاسىنا دەيىن قامتىعان باستامالارىن باعالاپ-باعامدادى»،–دەدى پرەزيدەنت.
ول جاڭا ورگان قۇرامىنا كاسىبي ماماندار مەن وتانشىل ازاماتتار سايلاناتىنىنا سەنىم ءبىلدىردى.
پرەزيدەنتتىڭ پىكىرىنشە، بۇل سايلاۋ قازاقستان تاريحىنداعى جاڭا كەزەڭنىڭ باستاۋىنا اينالماق.
«ادامدار كوپ جاعدايدا قابىلدانعان ماڭىزدى شەشىمدەردىڭ شىنايى قۇندىلىعىن جىلدار وتكەن سوڭ عانا تۇسىنەدى. الداعى جەكسەنبى ەل تاعدىرى ءۇشىن ءدال وسىنداي بەتبۇرىستى ءسات بولادى. ءبىز قازاقستان تاريحىنداعى جاڭا كەزەڭگە قادام باسامىز. وسىنداي تاعدىرشەشتى ساتتە ءار ادامنىڭ داۋىسى ماڭىزدى ەكەنى ءسوزسىز»،–دەدى مەملەكەت باسشىسى.
