كونستيتۋتسيالىق كوميسسيا جارتى جىل بويى قوعامدىق تالقىلاۋلاردىڭ نەگىزىندە دايىندالعان جاڭا اتا زاڭنىڭ قورىتىندى ءماتىنىن مەملەكەت باسشىسى قاسىم-جومارت توقاەۆقا ۇسىندى.
جاڭا اتا زاڭنىڭ جوباسى قوعامدا جان-جاقتى قىزۋ تالقىلاۋ ءجۇردى. ازاماتتاردان 10 مىڭعا جۋىق ۇسىنىس كەلىپ ءتۇستى. بۇل قوعام تاراپىنان ۇلكەن قىزىعۋشىلىق بولعانىن جانە ازاماتتاردىڭ بارىنشا بەلسەندىلىك كورسەتكەنىن ايعاقتايدى.
اتا زاڭنىڭ ءماتىنىن ءاربىر وڭىردەن جينالعان، ءتۇرلى سالانىڭ وكىلدەرىنەن قۇرالعان، تىكەلەي ەفيردە، اشىق فورماتتا جۇمىس ىستەيتىن 130 ادامنان تۇراتىن اۋقىمدى كوميسسيا جازدى. سول سەبەپتى، جاڭا اتا زاڭدى شىن مانىندە حالىقتىق كونستيتۋتسيا دەۋگە بولادى.
كونستيتۋتسيالىق كوميسسيانىڭ 12-ءشى وتىرىسىندا، مەملەكەتتىك كەڭەسشى ەرلان قارين كوميسسيا مۇشەلەرىنىڭ اتىنان پرەزيدەنتكە ەلدىك ءىستىڭ ورتاسىندا جۇرۋگە مۇمكىندىك بەرگەنى ءۇشىن ريزاشىلىعىن ءبىلدىردى.
«بىزگە وسىنداي ۇلكەن جۇمىستىڭ، ەلدىك ءىستىڭ ورتاسىندا جۇرۋگە مۇمكىندىك بەرگەن مەملەكەت باسشىسىنا كونستيتۋتسيالىق كوميسسيا مۇشەلەرى اتىنان ريزاشىلىق بىلدىرۋگە رۇقسات ەتىڭىزدەر. سەبەبى، كەز كەلگەن وتانشىل ازامات ءۇشىن ەلگە قىزمەت ەتۋ – مىندەت، ال تاريحي ماڭىزى بار ىستەردىڭ ورتاسىنان تابىلۋ – ول ابىروي»، – ەرلان قارين.
مەملەكەت باسشىسىنىڭ جارلىعىنا سايكەس رەسپۋبليكالىق رەفەرەندۋم 2026 جىلعى 15 ناۋرىزدا وتەدى. تۇپكىلىكتى شەشىمدى قازاقستان حالقى قابىلدايتىن بولادى.
