تەحاس شتاتىنىڭ وڭتۇستىك-شىعىس اۋداندارىن تاسقىن سۋ باستى، دەپ حابارلايدى "ادىرنا" ۇلتتىق پورتالى حابار24-كە سىلتەپ.
جۇما كۇنى باستالعان جاۋىن تولاسسىز جاۋىپ، پولك، مونتگومەري، ليبەرتي جانە حارريس اۋداندارىن جايلاعان.
سالدارىنان وزەن، كولدەر ارناسىنان تاسىپ، سان-حاسينتو وزەنىنىڭ شىعىس تارماعىنداعى سۋ ماكسيمالدى دەڭگەيگە جەتكەن. قۇتقارۋشىلار 400-دەن استام ادامدى سۋدا قالعان ۇيلەرىنەن جانە جولداردا قۇتقارىپ قالدى.
سينوپتيكتەر تاسقىن سۋ كەيبىر ۇيلەردىڭ شاتىرىنا دەيىن جەتكەنىن حابارلاعان.
ال رايان حولل ەسىمدى باقىلاۋشى مۇنداي تاسقىندى كورمەگەنىن ايتادى.
"بۇل مەنىڭ كارەرامدا كورگەن ەڭ قاتتى تاسقىن. ءوزىم وسى جەردىڭ تۋماسىمىن، وزەن سۋىنىڭ وسىنشاما بيىك كوتەرىلگەن كەزى ەسىمدە جوق. كەشە تەحاسستىق باقىلاۋشىلار 100-دەن اسا ادامدى قۇتقاردى. قالعانىن ءبىزدىڭ جەرگىلىكتى سەرىكتەستەرىمىز بەن وزگە دە مەملەكەتتىك ۇيىم وكىلدەرى قۇتقاردى. سان-حاسينتو وزەنى سۋ باسقارماسىنىڭ مالىمەتىنشە، سوڭعى اپتادا كونرو كولىنىڭ ماڭايىنا 50 سم جاۋىن-شاشىن تۇسكەن. قاتتى جاڭبىر سالدارىنان بوگەتتەگى سۋ مولشەرىنەن اسىپ، تاسىعان سوڭ جىرىپ اعىزۋعا ءماجبۇر بولعان", - دەدى ول.
