بۇگىن، 10 مامىردا ازەربايجان مەن ارمەنيانىڭ سىرتقى ىستەر مينيسترلەرى ەكىجاقتى كەلىسسوزدەر جۇرگىزۋ ءۇشىن الماتى قالاسىنداعى دوستىق ۇيىنە كەلدى، دەپ حابارلايدى «ادىرنا» ءتىلشىسى.
قوناقتاردى قازاقستان ءسىم باسشىسى مۇرات نۇرتىلەۋ قارسى الىپ، مينيسترلەر كەزدەسۋ راسىمىنە قاتىسۋ ءۇشىن دوڭگەلەك زالعا ءوتتى. وسى زالدا 1991 جىلى الماتى دەكلاراتسياسىنا قول قويىلعان بولاتىن. ول تمد ەلدەرىنىڭ تاۋەلسىز دامۋىنىڭ نەگىزدەرىن بەلگىلەپ، مەملەكەتارالىق شەكارالاردى ايقىنداۋ قاعيداتتارىن بەكىتتى.
مينيستر ازەربايجان مەن ارمەنيا ءبىز ءۇشىن جاقىن باۋىرلاس ەلدەر عانا ەمەس، سونىمەن قاتار ستراتەگيالىق سەرىكتەس ەكەنىن مالىمدەپ، تاراپتارعا جەمىستى جۇمىس پەن سەنىمدى ديالوگ تىلەدى.
ازەربايجان مەن ارمەنيانىڭ سىرتقى ساياسي ۆەدومستۆولارىنىڭ باسشىلارى ءوز سوزدەرىندە قازاقستان تاراپىنا كەلىسسوزدەر الاڭىن ۇسىنعانى جانە ءىس-شارانىڭ جوعارى دەڭگەيدە ۇيىمداستىرىلعانى ءۇشىن العىستارىن ءبىلدىردى.
كەزدەسۋ راسىمىنەن كەيىن ازەربايجان مەن ارمەنيا دەلەگاتسيالارى ەكىجاقتى فورماتتاعى كەلىسسوزدەردى باستاۋ ءۇشىن كورشى زالعا ءوتتى.
ايتا كەتەيىك، كەزدەسۋدىڭ نەگىزگى كۇن ءتارتىبى - ەكى ەل اراسىنداعى شەكارا ماسەلەسى.
