قازاقستان پرەزيدەنتى قاسىم-جومارت توقاەۆ باس پروكۋرور عيزات نۇرداۋلەتوۆتى قابىلدادى. مەملەكەت باسشىسى باس پروكۋرورعا ارىستاعى جارىلىسقا كىنالى تۇلعالاردىڭ ءبارىن جاۋاپقا تارتۋدى تاپسىردى، دەپ حابارلايدى اقوردا.
عيزات نۇرداۋلەتوۆ مەملەكەت باسشىسىنا قاداعالاۋشى ورگاننىڭ بيىلعى ءبىرىنشى جارتىجىلدىقتاعى جۇمىستارىنىڭ ناتيجەلەرى مەن الداعى كەزەڭگە ارنالعان جوسپارلارى تۋرالى باياندادى.
بۇدان بولەك، توقاەۆقا باس پروكۋراتۋرانىڭ قۇقىق قورعاۋ ورگاندارىنىڭ قىلمىسپەن كۇرەسكە جانە قوعامدىق ءتارتىپتى قامتاماسىز ەتۋگە باعىتتالعان ۇيلەستىرۋ فۋنكتسياسىن كۇشەيتۋ جۇمىستارىنىڭ ورىندالۋى جونىندە باياندالدى.
سونداي-اق، عيزات نۇرداۋلەتوۆ ازاماتتاردىڭ كونستيتۋتسيالىق قۇقىقتارىن قورعاۋ جونىندەگى شارالار تۋرالى ەسەپ بەردى.
قازاقستان پرەزيدەنتى باس پروكۋرورعا ارىس قالاسىنداعى جارىلىستارعا قاتىستى قىلمىستىق ءىستى تەرگەۋ بارىسىندا ادىلدىك پەن زاڭدىلىقتى قامتاماسىز ەتۋدى جانە كىنالى تۇلعالاردىڭ ءبارىن جاۋاپقا تارتۋدى تاپسىردى.
توقاەۆ كۇش-جىگەردى ازاماتتاردىڭ قۇقىعىن قورعاۋعا، سىبايلاس جەمقورلىق پەن كولەڭكەلى ەكونوميكاعا قارسى كۇرەسكە جۇمىلدىرۋ قاجەتتىگىن ايتتى.
