تاشكەنت وبلىسى المالىق قالاسىنىڭ 28 جاستاعى تۇرعىنى وزبەكستان پرەزيدەنتى شاۆكات ميرزيەەۆتى بالاعاتتادى دەپ ايىپتالدى. بۇل تۋرالى گازەتا.uz جازدى، دەپ حابارلايدى «ادىرنا» ءتىلشىسى.
ۇكىمدى 8 ساۋىردە سامارقاند وبلىسىنىڭ ىستىقحان اۋداندىق قىلمىستىق ىستەر جونىندەگى سوتى شىعاردى.
سوتتالۋشى — فارماتسەۆتيكالىق كومپانيانىڭ نەگىزىن قالاۋشى. ول 2023 جىلدىڭ 2 مامىرى مەن 31 تامىزى ارالىعىندا Instagram جەلىسىندە پرەزيدەنتكە ءتىل تيگىزەتىن پىكىرلەر قالدىرعان. ەر ادام كىناسىن تولىق مويىنداپ، جاساعان ارەكەتىنە وكىنەتىنىن جەتكىزدى.
سوت المالىق تۇرعىنىن وزبەكستان قىلمىستىق كودەكسىنىڭ 158-بابىنىڭ 3-بولىگى («وزبەكستان رەسپۋبليكاسى پرەزيدەنتىن جاريا تۇردە قورلاۋ نەمەسە جالا جابۋ، سول سياقتى ءباسپاسوز نەمەسە وزگە دە بۇقارالىق اقپارات قۇرالدارىن، تەلەكوممۋنيكاتسيا جەلىلەرىن نەمەسە ينتەرنەتتى پايدالانۋ») بويىنشا كىنالى دەپ تاپتى. ول 2 جىل 6 اي تۇزەۋ جۇمىستارى تۇرىندەگى جازاعا تارتىلدى. سونداي-اق اي سايىن جالاقىسىنىڭ 20 پايىزى ءوندىرىپ الىناتىن بولادى.
ەسكە سالايىق، بۇعان دەيىن جىل باسىنان بەرى وزبەكستان پرەزيدەنتىن «بالاعاتتادى» دەگەن 10 ادامنىڭ سوتتالعانىن جازعان ەدىك.