باس پروكۋروردىڭ مىندەتىن اتقارۋشى تيمۋر تاشىمباەۆ بولات نازارباەۆتىڭ قىزى اقبوتا نازارباەۆامەن بايلانىستى الماتى تاۋلارىنداعى سەل بوگەتىنە قاتىستى ءىستىڭ قانداي باپپەن تەرگەلىپ جاتقانىن ايتتى، دەپ حابارلايدى «ادىرنا» ءتىلشىسى قازتاگ-قا سىلتەمە جاساپ.
«اقساي بوگەتى بويىنشا «TOLAGAI-2050» جشس مەردىگەرلىك ۇيىمىنىڭ 13 قىركۇيەك 2023 جىلعى مىندەتتەرىن تيىسىنشە ورىنداماۋىنا بايلانىستى توتەنشە جاعدايلار مينيسترلىگى «قازسەلدەنقورعاۋ» مم-ءسى «اقساي وزەنى باسسەينىندە سەلدى ۇستايتىن بوگەت سالۋ» جوباسىن ىسكە اسىرۋعا ارنالعان شارتتى بىرجاقتى تəرتىپپەن بۇزدى. 2024 جىلدىڭ 6 ساۋىرىنەن باستاپ الماتى قالاسى بويىنشا ەكونوميكالىق تەرگەۋ دەپارتامەنتى جشس باسشىلىعىنا قاتىستى قىلمىستىق كودەكستىڭ 189-بابىنىڭ 4-بولىگى (سەنىپ تاپسىرىلعان بوتەن مۇلىكتى اسا ءىرى مولشەردە يەمدەنىپ الۋ نەمەسە تالان-تاراجعا سالۋ) بويىنشا سوتقا دەيىنگى تەرگەپ-تەكسەرۋدى جۇرگىزۋدە»، - دەدى تاشىمباەۆ ءماجىلىس دەپۋتاتتارىنىڭ ساۋالىنا جاۋاپ بەرە وتىرىپ.
ەسكە سالساق، 12 ساۋىردە توتەنشە جاعدايلار مينيسترلىگى اقساي باسسەينىندەگى بوگەتكە قاتىستى جاعدايدا الماتىنىڭ 30 مىڭعا جۋىق تۇرعىنىنىڭ ومىرىنە قاۋىپ ءتونىپ تۇرعانىن جانە قىلمىستىق ءىس قوزعالعانىن حابارلاعان بولاتىن. ءساۋىردىڭ 13-ءى كۇنى قازتاگ اگەنتتىگى اقبوتا نازارباەۆامەن بايلانىستى اقساي وزەنىندە سەل ۇستاعىش بوگەت سالۋى ءتيىس «تولاعاي-2050» جشس-ءنىڭ 170-تەن استام مەملەكەتتىك كەلىسىمشارتى بار ەكەنىن، ولاردىڭ كوپشىلىگىنىڭ قۇنى ميللياردتاعان تەڭگەنى قۇرايتىنىن جازدى.
