بالانى ءبىرىنشى سىنىپقا قانشا جاسىندا بەرۋ ماسەلەسى كوپتەن بەرى قوعامنىڭ تالقىسىنا تۇسۋدە. مەكتەپ تابالدىرىعىن بالا التى جاسىندا اتتاعانى دۇرىس دەۋشىلەر مەن بۇل پىكىرمەن كەلىسپەيتىندەر بۇگىنگە دەيىن ورتاق مامىلەگە كەلگەن جوق. وسى ماسەلە تۋرالى نۇر سۇلتاننىڭ ورتالىق كوممۋنيكاتسيالار قىزمەتىندە وتكەن ءباسپاسوز بريفينگىندە ەلىمىزدىڭ ءبىلىم جانە عىلىم ءمينيسترى اسحات ايماعامبەتوۆ تۇسىنىك بەردى دەپ حابارلايدى Sputnik. قازاقستان.
«2014 جىلى رەپۋبليكا بويىنشا ءبىرىنشى سىنىپقا قابىلدانعان 320 مىڭ بالانىڭ 60 پايىزى التى جاستاعىلار بولعان. ال وتكەن جىلى بۇل كورسەتكىش 80 پايىزدى قۇراعان. يۋنەسكو-نىڭ مالىمەتىنشە، الەمنىڭ 134 ەلىندە بالا التى جاسىنان مەكتەپكە بارادى. سوندىقتان مۇندا تۇرعان ەشتەڭە جوق. ارينە، كەيبىر بالانىڭ جەكەلەگەن ەرەكشەلىگىنە قاراي، التى جاستا ءبىرىنشى سىنىپقا بارا الماۋى مۇمكىن. ءبىز بۇل جاعىن دا ەكەرۋىمىز قاجەت. دەسەك تە، زاڭعا ەنگىزىلگەن وزگەرىس ءوز كۇشىنە ەندى، سوندىقتان زاڭ بويىنشا جۇمىس ىستەۋىمىز كەرەك»، - دەدى مينيستر. سونىمەن قاتار، ايماعامبەتوۆ زاڭ تالابىنا قاتىستى: «وسىعان دەيىنگى زاڭدا بالانىڭ التى جاستان ءبىرىنشى سىنىپقا قابىلدانۋى تۋرالى تالاپ بولدى. وسى تالاپتا «التى» ءسوزىنىڭ قاسىندا جاقشانىڭ ىشىندە «جەتى» سانى قاتار كورسەتىلگەن»، -دەپ ءتۇسىندىردى.
ەگەر بالاڭىز فيزيولوگيالىق، پسيحولوگيالىق تۇرعىدان مەكتەپكە بارۋعا دايىن بولسا، التى جاسىنان ءبىرىنشى سىنىپقا قابىلدانادى. بالانىڭ قارىم -قابىلەتى تۋرالى ارينە، ارنايى ماماندار قورىتىندى جاسايدى. ال ەگەر ناقتى ءبىر سەبەپتەرمەن نەمەسە دەنساۋلىعىنا بايلانىستى التى جاسار بالاڭىز ءبىرىنشى سىنىپقا بارماسا، مينيسترلىك نەمەسە باسقا دا ورگان تاراپى اتا- اناعا ايىپپۇل سالمايدى. «بالانى التى جاسىندا ءبىرىنشى سىنىپقا بەرمەگەن اتا-اناعا ايىپپۇل سالادى دەگەن ءسوز - وتىرىك. بۇل ءۇشىن الدەبىر ورگان ايىپپۇل سالادى دەۋ دە شىندىققا جاناسپايدى»، -دەگەن مينيستر ايماعامبەتوۆ التى جاستان ءبىرىنشى سىنىپقا قابىلداۋ تۋرالى زاڭ تالابى ءۇش جىل بۇرىن بەكىتىلگەنىن قايتالاپ ايتتى.
ال بالانى التى جاستان مەكتەپكە بەرۋ تۋرالى ءوزىنىڭ جەكە كوزقاراسىن مينيستر: «مەنەن دە وسى ماسەلەگە قاتىستى ۇنەمى سۇرايدى. ءوزىمنىڭ بالام دا ءبىرىنشى سىنىپقا التى جاسىنان باردى. بالا بەس-التى جاسىندا وتە بەلسەندى داميدى. بالامدى ءبىرىنشى سىنىپقا بەرمەس بۇرىن، مەن دە كوپ ويلاندىم. ويلانا كەلە، بالامدى التى جاسىندا ءبىرىنشى سىنىپقا بەردىم. ول ءۇشىن ەش وكىنبەيمىن»، -دەدى.
مەرۋەرت تۇرلىبەك
