Balany birinshi synypqa qansha jasynda berý máselesi kópten beri qoǵamnyń talqysyna túsýde. Mektep tabaldyryǵyn bala alty jasynda attaǵany durys deýshiler men bul pikirmen kelispeıtinder búginge deıin ortaq mámilege kelgen joq. Osy másele týraly Nur Sultannyń Ortalyq kommýnıkaııalar qyzmetinde ótken baspasóz brıfınginde elimizdiń Bilim jáne ǵylym mınıstri Ashat Aımaǵambetov túsinik berdi dep habarlaıdy Sputnik. Qazaqstan.
«2014 jyly repýblıka boıynsha birinshi synypqa qabyldanǵan 320 myń balanyń 60 paıyzy alty jastaǵylar bolǵan. Al ótken jyly bul kórsetkish 80 paıyzdy quraǵan. IýNESKO-nyń málimetinshe, álemniń 134 elinde bala alty jasynan mektepke barady. Sondyqtan munda turǵan eshteńe joq. Árıne, keıbir balanyń jekelegen ereksheligine qaraı, alty jasta birinshi synypqa bara almaýy múmkin. Biz bul jaǵyn da ekerýimiz qajet. Desek te, zańǵa engizilgen ózgeris óz kúshine endi, sondyqtan zań boıynsha jumys isteýimiz kerek», - dedi mınıstr. Sonymen qatar, Aımaǵambetov zań talabyna qatysty: «Osyǵan deıingi zańda balanyń alty jastan birinshi synypqa qabyldanýy týraly talap boldy. Osy talapta «alty» sóziniń qasynda jaqshanyń ishinde «jeti» sany qatar kórsetilgen», -dep túsindirdi.
Eger balańyz fızıologııalyq, psıhologııalyq turǵydan mektepke barýǵa daıyn bolsa, alty jasynan birinshi synypqa qabyldanady. Balanyń qarym -qabileti týraly árıne, arnaıy mamandar qorytyndy jasaıdy. Al eger naqty bir sebeptermen nemese densaýlyǵyna baılanysty alty jasar balańyz birinshi synypqa barmasa, mınıstrlik nemese basqa da organ tarapy ata- anaǵa aıyppul salmaıdy. «Balany alty jasynda birinshi synypqa bermegen ata-anaǵa aıyppul salady degen sóz - ótirik. Bul úshin áldebir organ aıyppul salady deý de shyndyqqa janaspaıdy», -degen mınıstr Aımaǵambetov alty jastan birinshi synypqa qabyldaý týraly zań talaby úsh jyl buryn bekitilgenin qaıtalap aıtty.
Al balany alty jastan mektepke berý týraly óziniń jeke kózqarasyn mınıstr: «Menen de osy máselege qatysty únemi suraıdy. Ózimniń balam da birinshi synypqa alty jasynan bardy. Bala bes-alty jasynda óte belsendi damıdy. Balamdy birinshi synypqa bermes buryn, men de kóp oılandym. Oılana kele, balamdy alty jasynda birinshi synypqa berdim. Ol úshin esh ókinbeımin», -dedi.
Merýert TURLYBEK
