الماتى قالاسى №2 المالى اۋداندىق سوتى ەكس-كۇيەۋىنىڭ قولىنان قازا تاپقان زاڭگەر ايمان اسانوۆانىڭ اعاسىنا مورالدىق زيان وتەماقىسىن ءوندىرۋ تۋرالى شەشىم شىعاردى. بۇل تۋرالى 11 شىلدەدە جوعارعى سوتتىڭ ءباسپاسوز قىزمەتى ايتتى، دەپ حابارلايدى «ادىرنا» ءتىلشىسى.
مارقۇمنىڭ اعاسى قارىنداسىنىڭ ءولىمى وعان جانە بارلىق جاقىنىنا اۋىر قايعى-قاسىرەت اكەلگەنىن مالىمدەدى. ايتۋىنشا، اجەسى مەن اكەسى ۋايىم-قايعىنىڭ سالدارىنان قايتىس بولعان. ول وتباسىنا كەلتىرىلگەن مورالدىق زياندى 50 ملن تەڭگەگە باعالادى.
جاۋاپكەردىڭ وكىلى قويىلعان تالاپتى مويىنداماي، ايەلدىڭ ولىمىنە كىنالى ادامعا قىلمىسى ءۇشىن جازا قولدانىلعانىن – ونىڭ 11 جىلعا باس بوستاندىعىنان ايىرىلعانىن جانە قويىلعان تالاپتا كورسەتىلگەن سومانىڭ قولىندا جوق ەكەنىن اتاپ كورسەتتى.
سوت قويىلعان تالاپتى ءىشىنارا قاناعاتتاندىردى. پاراساتتىلىق پەن ادىلدىك تالاپتارىن باسشىلىققا الا وتىرىپ، تالاپ قويۋشىنىڭ پايداسىنا مورالدىق زياندى وتەۋ رەتىندە 10 ملن تەڭگە ءوندىرىلدى.
شەشىم زاڭدى كۇشىنە ەنگەن جوق.
ەسكە سالايىق، 2022 جىلدىڭ 8 قازانىندا تۇنگى 23:00 شاماسىندا زاڭگەر ايمان اسانوۆاعا شابۋىل جاسالعان ەدى. ايەل ءتۇرلى پىشاق جاراقاتىمەن اۋرۋحاناعا جەتكىزىلىپ، 12 قازاندا كوز جۇمدى. قايعىلى وقيعا بولاردان 4 كۇن بۇرىن ونىڭ بۇرىنعى كۇيەۋى تالعات نۇرتاەۆ «مۇلىكتى ءبولىسۋدى تالقىلاۋعا» كەلگەن. ەكس-جۇبايلار اراسىندا داۋ تۋىپ، ەر ادام اسانوۆانى 18 جەرىنەن پىشاقتاپ تاستاعان.
