ادىلەت ەكس-ءمينيسترى مارات بەكەتاەۆقا قاتىستى سوتقا دەيىنگى تەرگەپ-تەكسەرۋ اياقتالدى. بۇل تۋرالى بۇگىن، 12 شىلدەدە انتيكوردىڭ ءباسپاسوز قىزمەتى جازدى، دەپ حابارلايدى «ادىرنا» ءتىلشىسى.
ول جەكە كومپانيانىڭ باسشىلىعىمەن بىرگە بيۋدجەت قاراجاتىن اسا ءىرى مولشەردە جىمقىردى، الاياقتىق جاسادى جانە كاسىپكەرلىك قىزمەتكە زاڭسىز قاتىستى دەپ كۇدىكتەنەدى.
سونداي-اق اگەنتتىك بۇرىنعى مادەنيەت جانە سپورت ۆيتسە-ءمينيسترى ەرلان قوجاعاپانوۆ پەن مەردىگەر ۇيىمنىڭ باسشىلىعىنا قاتىستى لاۋازىمدىق وكىلەتتىكتەرىن اسىرا پايدالاندى جانە بيۋدجەت قاراجاتىن جىمقىردى دەگەن كۇدىك بويىنشا قىلمىستىق ءىستى تەرگەۋدى اياقتالعانىن مالىمدەدى.
«اتالعان ىستەردىڭ ارقايسىسى بويىنشا زالال 1 ملرد تەڭگەدەن اسادى»،—دەلىنگەن حابارلامادا.
ەسكە سالايىق، مارات بەكەتاەۆ 2023 جىلدىڭ 21 قازانىندا مەملەكەتكە ۇلكەن زيان كەلتىردى دەگەن كۇدىكپەن ۇستالعان ەدى. ول 2016-2022 جىلدارى ادىلەت ءمينيسترى بولدى. قاڭتار وقيعاسىنان كەيىن بۇل لاۋازىمنان كەتكەن شەنەۋنىك كوپ ۇزاماي پرەمەر-ءمينيستردىڭ كەڭەسشىسى بولىپ تاعايىندالدى.
ال بۇرىنعى ۆيتسە-مينيستر ەرلان قوجاعاپانوۆتىڭ ۋاقىتشا ۇستاۋ يزولياتورىنا قاماۋعا الىنعانى 1 ناۋرىزدا بەلگىلى بولدى. ول اۋىر جەمقورلىق قىلمىس جاسادى دەگەن كۇدىكپەن ۇستالعان ەدى.
