جامبىل وبلىسىندا جاستار جىلىنا وراي «بيزنەستىڭ جول كارتاسى - 2020» مەملەكەتتىك باعدارلاماسى اياسىندا وتكىزىلگەن مەملەكەتتىك گرانتتى 158 ازامات جەڭىپ الدى. بۇل تۋرالى وڭىرلىك كوممۋنيكاتسيالىق الاڭىندا وبلىس اكىمدىگىنىڭ كاسىپكەرلىك جانە يندۋستريالدى-يننوۆاتسيالىق دامىتۋ باسقارماسىنىڭ باسشىسى جەڭىس ساريەۆ مالىمدەدى.
جەڭىس بولاتۇلىنىڭ ايتۋىنشا، «بيزنەستىڭ جول كارتاسى – 2020» باعدارلاماسى جاس كاسىپكەرلەردىڭ ءوز جۇمىسىن باستاۋعا زور مۇمكىندىك. سوندىقتان دا ول اتالعان باعدارلاماسىنا قاتىسىپ، باق سىناعىسى كەلگەن جاستاردىڭ كوپ بولعانىن ايتادى.
– وزدەرىڭىزگە بەلگىلى بيىلعى جىلدى ەلباسى جاستار جىلى دەپ جاريالاپ، جاستارعا ايرىقشا قولداۋ ءبىلدىردى. وسىعان وراي جامبىل وبلىسىنىڭ جاستارىن قولداۋ ماقساتىندا «بيزنەستىڭ جول كارتاسى - 2020» مەملەكەتتىك باعدارلاماسى اياسىندا جەرگىكتى بيۋدجەتتەن 303 ميلليون تەڭگە، ال رەسپۋبليكالىق بيۋدجەتتەن 21 ميلليون تەڭگە ءبولىندى. جاس كاسىپكەرلەردى قولداۋ ماقساتىندا جالپى قۇنى 324 ميلليون تەڭگە بولاتىن گرانت ءبولىندى. گرانت ءبولۋ جانە كونكۋرس جاريالاۋ ءتارتىبى ارنايى ۇكىمەتتىڭ قاۋلىسىمەن بەكىتىلىپ، كونكۋرستتىق كوميسسيانىڭ قۇرامىنا 17 ادام كىردى. كونكۋرستتىڭ تالابى بويىنشا قارجى اگەنتتىگى توراعا بولا المايدى. سوندىقتان دا كونكۋرستىڭ توراعاسى وبلىستىق «اتامەكەن» فيلليالىنىڭ باسشىسى بولسا، قالعان مۇشەلەر باق قىزمەتكەرلەر مەن ءارتۇرلى سالادا قىزمەت اتقارىپ جۇرگەن قوعام بەلسەندىلەرى بولدى، – دەيدى ول.
سونداي-اق، جەڭىس بولاتۇلى باعدارلاماعا قىزىعۋشىلىق تانىتقان جاستاردىڭ كوپ بولعانىن ايتادى. ناقتىراق ايتساق، وبلىس بويىنشا گرانتتى ۇتىپ الۋعا نيەتتى 466 ۇمىتكەردەن ءوتىنىش كەلىپ تۇسكەن.
– اتاپ ايتسام، تاراز قالاسىنان 159, سارىسۋ اۋدانىنان 56, بايزاق اۋدانىنان 43, شۋ اۋدانىنان 31, مەركى اۋدانىنان 27, رىسقۇلوۆ اۋدانىنان 26, جامبىل اۋدانىنان 23, قورداي اۋدانىنان 16, تالاس اۋدانىنان 16 جانە مويىنقۇم اۋدانىنان 8 جوبا ۇسىنىلدى. اۋدانداردىڭ اراسىنان سارىسۋ اۋدانى وتە بەلسەندى بولعانىن ايتىپ وتكەن ءجون. ۇسىنىلعان 466 جوبانىڭ 21-ءى مۇمكىندىگى شەكتەۋلى ازامات بولىپ سانالادى. جوباعا قىزىعۋشىلىق جوعارى بولۋىنا بايلانىستى كونكۋرستتىڭ كوميسسيانىڭ 7 وتىرىسى ءوتتى. داۋىس بەرۋ پروتسەدۋراسىنا توقتالاتىن بولساق، ءار كومميسيا مۇشەسى ءوز پىكىرى حاتتاماعا ەنگىزىلدى. كوميسسيانىڭ ۇيعارىمى بويىنشا، 158 جاس كاسىپكەرگە گرانت بەرۋ تۋرالى شەشىم شىعارىلدى. باعدارلاماعا قاتىسقان 21 مۇمكىندىگى شەكتەۋلى ازاماتتىڭ 8-ءنىڭ جوباسى ماقۇلدانىپ وتىر. ال تاراز قالاسىنان 49, سارىسۋ اۋدانىنان 20, بايزاق اۋدانىنان 9, شۋ اۋدانىنان 7, مەركى اۋدانىنان 10, رىسقۇلوۆ اۋدانىنان 11, جامبىل اۋدانىنان 12, قورداي اۋدانىنان 6, مويىنقۇم اۋدانىنان 3, تالاس اۋدانىنان 16 جانە جۋالى اۋدانىنان 15 جوبا ماقۇلداندى. جالپى 158 جوبانىڭ ارقاسىندا 400 ادام جۇمىسپەن قامتىلاتىن بولادى، – دەيدى باسقارما باسشىسى.
مەملەكەتتىڭ دامۋى ءۇشىن شاعىن جانە ورتا كاسىپكەرلىك دامۋى قاجەت. بۇگىن 400 جۇمىس ورنىن اشقان 158 ازامات بولاشاقتا ءىرى كاسىپكەر بولادى دەپ سەنەمىز.
"ادىرنا" ۇلتتىق پورتالى
