Jambyl oblysynda jastar jylyna oraı «Bıznestiń jol kartasy - 2020» memlekettik baǵdarlamasy aıasynda ótkizilgen memlekettik grantty 158 azamat jeńip aldy. Bul týraly Óńirlik kommýnıkaııalyq alańynda oblys ákimdiginiń kásipkerlik jáne ındýstrıaldy-ınnovaııalyq damytý basqarmasynyń basshysy Jeńis Sarıev málimdedi.
Jeńis Bolatulynyń aıtýynsha, «Bıznestiń jol kartasy – 2020» baǵdarlamasy jas kásipkerlerdiń óz jumysyn bastaýǵa zor múmkindik. Sondyqtan da ol atalǵan baǵdarlamasyna qatysyp, baq synaǵysy kelgen jastardyń kóp bolǵanyn aıtady.
– Ózderińizge belgili bıylǵy jyldy Elbasy jastar jyly dep jarııalap, jastarǵa aıryqsha qoldaý bildirdi. Osyǵan oraı Jambyl oblysynyń jastaryn qoldaý maqsatynda «Bıznestiń jol kartasy - 2020» memlekettik baǵdarlamasy aıasynda jergikti bıýdjetten 303 mıllıon teńge, al respýblıkalyq bıýdjetten 21 mıllıon teńge bólindi. Jas kásipkerlerdi qoldaý maqsatynda jalpy quny 324 mıllıon teńge bolatyn grant bólindi. Grant bólý jáne konkýrs jarııalaý tártibi arnaıy Úkimettiń qaýlysymen bekitilip, konkýrsttyq komıssııanyń quramyna 17 adam kirdi. Konkýrsttyń talaby boıynsha Qarjy agenttigi tóraǵa bola almaıdy. Sondyqtan da konkýrstyń tóraǵasy oblystyq «Atameken» fıllıalynyń basshysy bolsa, qalǵan músheler BAQ qyzmetkerler men ártúrli salada qyzmet atqaryp júrgen qoǵam belsendileri boldy, – deıdi ol.
Sondaı-aq, Jeńis Bolatuly baǵdarlamaǵa qyzyǵýshylyq tanytqan jastardyń kóp bolǵanyn aıtady. Naqtyraq aıtsaq, oblys boıynsha grantty utyp alýǵa nıetti 466 úmitkerden ótinish kelip túsken.
– Atap aıtsam, Taraz qalasynan 159, Sarysý aýdanynan 56, Baızaq aýdanynan 43, Shý aýdanynan 31, Merki aýdanynan 27, Rysqulov aýdanynan 26, Jambyl aýdanynan 23, Qordaı aýdanynan 16, Talas aýdanynan 16 jáne Moıynqum aýdanynan 8 joba usynyldy. Aýdandardyń arasynan Sarysý aýdany óte belsendi bolǵanyn aıtyp ótken jón. Usynylǵan 466 jobanyń 21-i múmkindigi shekteýli azamat bolyp sanalady. Jobaǵa qyzyǵýshylyq joǵary bolýyna baılanysty konkýrsttyń komıssııanyń 7 otyrysy ótti. Daýys berý proedýrasyna toqtalatyn bolsaq, ár kommısııa múshesi óz pikiri hattamaǵa engizildi. Komıssııanyń uıǵarymy boıynsha, 158 jas kásipkerge grant berý týraly sheshim shyǵaryldy. Baǵdarlamaǵa qatysqan 21 múmkindigi shekteýli azamattyń 8-niń jobasy maquldanyp otyr. Al Taraz qalasynan 49, Sarysý aýdanynan 20, Baızaq aýdanynan 9, Shý aýdanynan 7, Merki aýdanynan 10, Rysqulov aýdanynan 11, Jambyl aýdanynan 12, Qordaı aýdanynan 6, Moıynqum aýdanynan 3, Talas aýdanynan 16 jáne Jýaly aýdanynan 15 joba maquldandy. Jalpy 158 jobanyń arqasynda 400 adam jumyspen qamtylatyn bolady, – deıdi basqarma basshysy.
Memlekettiń damýy úshin shaǵyn jáne orta kásipkerlik damýy qajet. Búgin 400 jumys ornyn ashqan 158 azamat bolashaqta iri kásipker bolady dep senemiz.
"Adyrna" ulttyq portaly
