مۇحتار جاكىشەۆتىڭ شاعىمىن قاراۋ ۋاقىتى بەلگىلى بولدى

 "قازاتومونەركاسىپ" ۇاك" اق بۇرىنعى باسشىسى مۇحتار جاكىشەۆتى شارتتى تۇردە مەرزىمىنەن بۇرىن بوساتۋ تۋرالى سوت شەشىمىنە تۇسىرىلگەن شاعىم 27 تامىزدا قارالمايدى، دەپ حابارلادى ادۆوكات نۇرلان بەيسەكەەۆ.

"2019 جىلدىڭ 10 قىركۇيەگىندە ساعات 16.00-دە قارالاتىن بولدى. ماعان SMS ارقىلى حابارلادى، نەگە كەيىنگە قالدىرعانىن ايتقان جوق", - دەدى بەيسەكەەۆ Sputnik قازاقستان تىلشىسىنە.

ەسكە سالا كەتسەك، جاكىشەۆتىڭ شارتى تۇردە مەرزىمىنەن بۇرىن بوساتۋ تۋرالى ءوتىنىشىن سوت 24 شىلدەدە قاراپ، بىراق قاناعاتتاندىرماعان ەدى. ال وسى سوت شەشىمىنە تۇسىرىگەن شاعىم وسكەمەندەگى شىعىس قازاقستان وبلىستىق سوتىندا 22 تامىزدا قارالۋى ءتيىس بولاتىن، كەيىن 27 تامىزعا شەگەرىلدى.

مۇحتار جاكىشەۆتىڭ ءىسى

مۇحتار جاكىشەۆ 2009 جىلدىڭ مامىر ايىندا ءىرى ۋران كەن ورىندارىندا مەملەكەتتىك ۇلەستى ساتتى دەگەن ايىپپەن ۇستالدى. سوت پروتسەسى جابىق رەجيمدە ءوتتى. سوت وتىرىسى كەزىندە سوتتالۋشىنىڭ دەنساۋلىعى سىر بەرۋىنە بايلانىستى تالاي رەت جەدەل جاردەم شاقىرىلعان. 2010 جىلدىڭ ناۋرىز ايىندا جاكىشەۆ ىسىراپ جاساپ، پارا العانى ءۇشىن ايىپتى دەپ تانىلىپ، 14 جىلعا باس بوستاندىعىنىن ايىرلدى.

وتكەن جىلى تۇرمەدەگى مەرزىمنىڭ جارتىسىنان كوبى ءوتتى. وسىعان بايلانىستى جاكىشەۆ شارتتى تۇردە مەرزىمىنەن بۇرىن بوساتۋعا ءوتىنىش ءبىلدىردى. الايدا سەمەي قالاسىنىڭ سوتى اتالعان ءوتىنىشتى قولداعان جوق.

بىلتىر شىلدە ايىندا جاكىشەۆتى سەمەيدەگى وۆ-156/14 كولونياسىنا اۋىستىردى. بۇعان دەيىن ول الماتى وبلىسىنداعى زارەچنىي اۋىلىندا جانە قاراعاندى وبلىسىنداعى دولينكا ەلدى مەكەنىندەگى تۇرمەدە وتىردى.

ادۆوكات نۇرلان بەيسەكەەۆتىڭ ايتۋىنشا، تۇرمەدە وتىرعان جاكىشەۆتىڭ دەنساۋلىعى ناشارلاپ كەتتى. ول بىرنەشە اۋرۋعا دۋشار بولعان. بىراق ءالى كۇنگە دەيىن تولىققاندى مەديتسينالىق تەكسەرىستەن وتپەپتى. بۇگىندە ول ءبىراز ءدارى ءىشىپ، ەمدەلۋگە ءماجبۇر. III توپتاعى مۇگەدەك تۋرالى انىقتاماسى بار.