داۋرەن قوسانوۆ قورعانىس ءمينيسترىنىڭ ورىنباسارى بولىپ تاعايىندالدى. بۇل تۋرالى بۇگىن، 30 قىركۇيەكتە اقوردانىڭ ءباسپاسوز قىزمەتى ايتتى، دەپ حابارلايدى «ادىرنا» ءتىلشىسى.
«مەملەكەت باسشىسىنىڭ وكىمىمەن داۋرەن جۇماتايۇلى قوسانوۆ قازاقستان رەسپۋبليكاسى قورعانىس ءمينيسترىنىڭ ورىنباسارى – قارۋلى كۇشتەرى اۋە قورعانىسى كۇشتەرىنىڭ باس قولباسشىسى بولىپ تاعايىندالدى، ول بۇرىنعى اتقارعان لاۋازىمىنان بوساتىلدى»،—دەلىنگەن حابارلامادا.
ايتا كەتەيىك، داۋرەن قوسانوۆ – 1969 جىلى 14 قازاندا پاۆلودار وبلىسى كراسنوكۋت اۋدانى نوۆوترويتسكوە اۋىلىندا دۇنيەگە كەلگەن.
1990 جىلى ارماۆير جوعارى اسكەري اۆياتسيالىق ۇشقىشتار ۋچيليششەسىن، 2005 جىلى يۋ. ا. گاگارين اتىنداعى اسكەري-اۋە اكادەمياسىن بىتىرگەن. ال 2013 جىلى رەسەي فەدەراتسياسى قارۋلى كۇشتەرى باس شتابىنىڭ اسكەري اكادەمياسىن تامامداعان.
ءار جىلدارى تالدىقورعانداعى "سۋ-27" ەسكادريلياسىنىڭ كومانديرى، قاراعاندى اۆيابازاسى شتابىنىڭ باستىعى، شىمكەنت اۆيابازاسىنىڭ كومانديرى، قازاقستان رەسپۋبليكاسى قارۋلى كۇشتەرى اۋە قورعانىسى كۇشتەرى اسكەري-اۋە كۇشتەرىنىڭ قولباسشىسى، اقتوبە قالاسىنداعى اۋە قورعانىسى كۇشتەرى اسكەري ينستيتۋتىنىڭ ديرەكتورى قىزمەتتەرىن اتقارعان.
