«اسىل ارمان» ۇلتتىق ءداستۇر مەن ونەردى قولداۋ» قوعامدىق بىرلەستىگى بيىلدا اۋقىمدى جۇمىستى اتقارادى. بۇل تۋرالى قوعامدىق بىرلەستىكتىڭ جەتەكشىسى رينات نۇراقباەۆ مالىمدەدى، دەپ حابارلايدى adyrna.kz ۇلتتىق پورتالى.
رينات نۇراقباەۆتىڭ ايتۋىنشا، ەلباسىنىڭ «رۋحاني جاڭعىرۋ» باعدارلاماسى ۇلتتىق قۇندىلىقتارىمىزدى دارىپتەپ، حالىقتىڭ رۋحاني مادەنيەتىن دامىتۋدا ايرىقشا ءرول اتقارىپ وتىر. سونداي-اق ول اتالعان باعدارلاما «اسىل ارمان» قوعامدىق بىرلەستىگىنىڭ جۇمىسىن جانداندىرا تۇسكەنىن ايتادى.
– 2011 جىلدىڭ تامىز ايىندا قۇرىلعان «اسىل ارمان» ۇلتتىق ءداستۇر مەن ونەردى قولداۋ» قوعامدىق بىرلەستىگى ۇلتتىق سالت-ءداستۇردى ناسيحاتتاۋعا ايرىقشا نازار اۋدارىپ وتىر. سوندىقتان دا ءبىز ەلباسىنىڭ «رۋحاني جاڭعىرۋ» باعدارلاماسى شىققاندا قاتتى قۋانىپ، ونىڭ ءمان-ماڭىزىن تەرەڭ سەزىندىك. ويتكەنى ءبىزدىڭ بۇعان دەيىن جۇرگىزگەن جۇمىسىمىز «رۋحاني جاڭعىرۋ» باعدارلاماسىنا تىكەلەي قاتىسى بولاتىن. سوندىقتان دا بيىل ءبىز وبلىستىق ىشكى ساياسات باسقارماسىنىڭ قولداۋىمەن «رۋحاني جاڭعىرۋ» باعدارلاماسى اياسىندا ارنايى جوبانى ىسكە اسىرامىز دەپ وتىرمىن. اتالعان باعدارلاما بويىنشا «جومارت جۇرەك» دەگەن اتپەن تاۋەلسىزدىك جىلدارىندا جەتىستىپ، حالىققا پايداسىن تيگىزىپ جۇرگەن ازاماتتاردى حالىققا ۇلگى رەتىندە تانىستىرامىز، – دەيدى ول.
سونداي-اق رينات دانيارۇلى وبلىس اكىمدىگىنىڭ ءبىلىم باسقارماسىنىڭ قولداۋىمەن قىز بالاسىنىڭ تاربيەسىنە قاتىستى جوبانى جۇزەگە اسىراتىنىن تىلگە تيەك ەتتى. سەبەبى ول 2011 جىلدان بەرى قىزداردىڭ ۇلتتىق تاريبيەسىنە ارنالعان «ينابات» كلۋبى جۇمىس جاساپ، اۋقىمدى ءىس-شارالاردى ىسكە اسىرعانىن ايتادى.
– وبلىستىق ءبىلىم باسقارماسىنىڭ قولداۋىمەن قىز بالالالاردى يناباتتىلىق جانە ءتان ساۋلىعىنا تاربيەلەۋ ماسەلەلەرى بويىنشا جۇمىس باستاپ وتىرمىز. ءبىز جوسپار بويىنشا اۋدان-اۋداندى ارالاپ، كەزدەسۋلەر ۇيىمداستىرامىز. ماسەلەن بۇگىن جامبىل اۋدانىنا بارىپ، ونداعى قىز-كەلىنشەكتەرمەن كەزدەسىپ قايتتىق. ءبىزدىڭ وبلىستىڭ قورداي، جامبىل، مەركى اۋداندارىندا وزگە ۇلت وكىلدەرى كوپ شوعىرلانعان. ولاردىڭ ىشىندە كامىلەتتىك جاسقا تولماي جاتىپ، نەكەگە تۇرۋشىلار كەزدەسىپ قالىپ جاتادى. كۇرتتەر مەن تۇرىكتەر جانە دۇنگەندەر وزدەرىنىڭ سالت-ءداستۇرى بويىنشا ەرتە جاستان نەكەگە تۇرا بەرەدى. ءبىز ولارعا ەرتە نەكەلەسۋدىڭ زيانى تۋرالى بايانداپ، زايارلى ۇستانىمدا بولۋعا شاقىرامىز. سونداي-اق قازاقي اۋدانداردا دا ءار ءتۇرلى ماسەلەلەر تۋىنداپ جاتاتىنى جاسىرىن ەمەس، – دەيدى ول.
«اسىل ارمان» ۇلتتىق ءداستۇر مەن ونەردى قولداۋ» قوعامدىق بىرلەستىگى تاربيەدەن بولەك، ءبىلىم الۋعا ايرىقشا كوڭىل ءبولىپ ءجۇر. وعان دالەل 2015 جىلدان بەرى وبلىستىق «جامبىل» تەلەارناسىنان كورەتىلىپ جاتقان «جاس تالاپ» ينتەللەكتۋالدىق تەلەويى.
– اتالعان جوبا ارقىلى مەكتەپ تۇلەكتەرى م.ح.دۋلاتي اتىنداعى تاراز مەملەكەتتىك ۋنيۆەرسيتەتىنىڭ 3 گرانتىن يەمدەنە الادى. سونداي-اق، «جاس تالاپتىڭ» تالاپتى قاتىسۋشىلارىنا 75 جانە 50 پايىزدىق جەڭىلدىكتەر قاراستىرىلعان. ەگەر تەگىن گرانتتىڭ ءبىرىن العان تۇلەك باسقا وقۋ ورنىنا تۇستەتىن بولسا، ءاۋ باستا رەكتورمەن كەلىسكەندەي وندا ول گرانت كۇيمەيدى. ياعني، كەلەسى ۇمىتكەرگە بەرىلەتىن بولادى. اللا قالاسا الداعى جىلى تاعى دا «جاس تالاپ» ينتەللەكتۋالدىق تەلەويىنى جالعاسىن تابادى دەپ سەنەمىن، – دەيدى ول.
رينات دانيارۇلى بىرلەستىك وبلىس پەن قالانىڭ قوعامدىق مادەني ءىس-شارالارىنا قاتىسىپ، حالىققا كوتەرىڭكى كوڭىل-كۇي سىيلايتىنىن ايتادى. سونداي-اق ۇيىم وكىلدەرى قارتتار جانە بالالار ءۇيى سەكىلدى الەۋمەتتىك مەكەمەلەرگە بارىپ، قايرىمدىلىق كونتسەرت ۇيىمداستىرادى.
"ادىرنا"
ۇلتتىق پورتالى
