جەڭىس – شاھاردىڭ قۇرمەتتى پەداگوگى

         ۇستازدار كۇنى قارساڭىندا «ورال قالاسىنىڭ قۇرمەتتى پەداگوگى» توسبەلگىسىن يەلەنگەن دىنمۇحامەد قوناەۆ اتىنداعى №44 مەكتەپ-گيمنازياسى تاريح ءپانىنىڭ مۇعالىمى، پەداگوگيكا عىلىمدارىنىڭ ماگيسترى، پەداگوگ-شەبەر جەڭىس حامزين 27 جىلدان بەرى ۇستازدىق ەتىپ كەلەدى.

          جەڭىس كاكىبايۇلى سىرىم اۋدانى العاباس اۋىلىن تۋماسى.  سىرىم اۋدانى جىمپيتى ورتا مەكتەبىن 1991 جىلى ءبىتىرىپ، 1993 جىلى ورال قالاسىنداعى ا.س.پۋشكين اتىنداعى پەداگوگيكالىق ينستيتۋتقا وقۋعا تۇسەدى. 1997 جىلى جوعارى وقۋ ورنىن ءتامامداپ، العاشقى ەڭبەك جولىن تۋعان جەرى سىرىم ەلىندەگى قادىر مىرزاليەۆ اتىنداعى ورتا مەكتەپتە تاريح پانىنەن ساباق بەرەدى. 2013-2014 جىلدارى بقو ءبىلىم باسقارماسىنىڭ وقۋ-ادىستەمەلىك كابينەتىندە تاريح ءپانىنىڭ ادىسكەرى، 2014-2021 جىلدارى قالاداعى №46 ورتا مەكتەپتە ديرەكتوردىڭ وقۋ ءىسى جونىندەگى ورىنباسارى، تاريح ءپانىنىڭ مۇعالىمى قىزمەتتەرىن اتقارادى. 2021 جىلدان بەرى دىنمۇحامەد قوناەۆ اتىنداعى №44 مەكتەپ-گيمنازياسىنىڭ تاريح ءپانىنىڭ مۇعالىمى.

ءوڭىردىڭ ۇزدىك تاريحشىسىنىڭ جەتىستىكتەرى دە جەتەرلىك. ءار كەزەڭدە تىنىمسىز ەڭبەگى ەلەنىپ، وبلىستىق ءبىلىم باسقارماسىنىڭ قۇرمەت گراموتاسىن يەلەنىپ، «ورال قالاسىنىڭ قۇرمەتتى پەداگوگى» اتاندى.   استانا قالاسى ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىندە «تۋعان جەر» باعدارلاماسى اياسىندا ۇيىمداستىرىلعان «وتان وتباسىنان باستالادى» تاقىرىبىنداعى رەسپۋبليكالىق جوبالار، ۇزدىك اۆتورلىق باعدارلامالار بايقاۋلارىندا جۇلدەگەر اتانىپ ءجۇر.

جەڭىس كاكىبايۇلىنىڭ شاكىرتتەرى وبلىستىق، رەسپۋبليكالىق بايقاۋلار مەن وليمپيادالارىندا ۇنەمى كوش باستاپ كەلەدى. تەك اعىمداعى جىلدىڭ وزىندە وبلىستىق وليمپيادادا شاكىرتتەرى ن.اسكاروۆا، ا.مەڭدىباي، ا.يگاليەۆا جۇلدەلى ورىنداردى يەلەنگەن.

مۇعالىم ءوزىنىڭ پەداگوگيكالىق شەبەرلىگىن ۇنەمى جەتىلدىرىپ كەلەدى، قاشىقتان ۇيىمداستىرىلاتىن پاندىك وليمپيادالارعا قاتىسىپ، ءىس-تاجىريبەسىمەن رەسپۋبليكالىق باسىلىم بەتتەرىندە ءبولىسىپ وتىرادى.

– اتا-انام دا ۇلاعاتتى ۇستازدار، سول سەبەپتى ابىرويلى مۇعالىم بولماۋعا حاقىم جوق. ۇستازدار اۋلەتىندە تاربيەلەنگەن سوڭ ماماندىق تاڭداۋدا اتا-انامنىڭ ىقپالى زور بولدى. كۇنى بۇگىنگە دەيىن ۇستازدىق ماماندىعىن تاڭداعانىما وكىنگەن ەمەسپىن. 27 جىلدان استام وسى سالادا ەڭبەك ەتىپ كەلەمىن، – دەيدى تاريحشى.