قولا ءمۇسىن كوركەمونەر گالەرەياسىنىڭ اۋلاسىنا قويىلدى. سۋرەتشىنىڭ 120 جىلدىعىنا ارنالعان بۇل مەرەكە ەسكەرتكىشتىڭ شىمىلدىعىن ءتۇسىرىپ، الدىنا گۇل شوقتارىن قويۋدان باستالدى. مەرەيتويلىق شارالارعا جەتىسۋ وبلىسىنىڭ اكىمى بەيبىت يساباەۆ، مەملەكەت جانە قوعام قايراتكەرلەرى مىرزاتاي جولداسبەكوۆ، قۋانىش سۇلتانوۆ، قازاقستاننىڭ حالىق جازۋشىسى بەكسۇلتان نۇرجەكەەۆ، كورنەكتى قىلقالام شەبەرىنىڭ قىزى گۇلداريا قاستەەۆا، قازاقستان سۋرەتشىلەر وداعىنىڭ باسقارما توراعاسى ومىربەك جۇبانيازوۆ، زيالى قاۋىم وكىلدەرى، جالپى وبلىس جۇرتشىلىعى قاتىستى. قۇتتىقتاۋ ءسوز العان جەتىسۋ وبلىسىنىڭ اكىمى بەيبىت يساباەۆ مەرەيتويلىق شارالاردىڭ ءمان-ماڭىزىنا توقتالدى: - جەتىسۋ – قاشاندا قاسيەتتى ونەردىڭ كيەلى بەسىگى بولعان ولكە. وسى ءوڭىردىڭ ءتول پەرزەنتتەرىنىڭ ءبىرى دە بىرەگەيى ءابىلحان اتامىز – قازاق حالقىنىڭ كاسىپقوي كوركەمسۋرەت ونەرىنىڭ تۇما باستاۋى، تۇڭعىش سۋرەتشىسى. ول سۋرەت ونەرىندە قاراپايىم ءومىر فيلوسوفياسىنا،  ۇلتتىق دۇنيەتانىمعا ارقا سۇيەدى، سول ارقىلى تۋعان حالقىنىڭ تاريحى مەن ءومىر سالتىن بەينەلەپ بەردى. ءومىر قىسقا بولعانمەن، ونەر ماڭگىلىك. قانشا عاسىر وتسە دە، ءابىلحان قاستەەۆتىڭ ەسىمى تاريحتا التىن ارىپتەرمەن جازىلىپ، سۋرەتشىنىڭ باي مۇراسى ەلدىڭ اسىل قازىناسى رەتىندە ۇرپاقتان ۇرپاققا جەتە بەرەتىنى ءسوزسىز، - دەگەن ب. يساباەۆ ەسكەرتكىشتەگى سۋرەتشى بەينەسىن جەتكىزۋ يدەياسىنىڭ اۆتورى كورنەكتى عالىم مىرزاتاي جولداسبەكوۆكە، مۇسىنشىلەر رينات ابەنوۆ پەن ەربول زيابەكوۆكە جەتىسۋلىقتاردىڭ اتىنان شىنايى ريزاشىلىعىن ءبىلدىردى. مۇنان سوڭ ءسوز العان كورنەكتى مەملەكەت جانە قوعام قايراتكەرى، ۇلتتىق عىلىم اكادەمياسىنىڭ  اكادەميگى مىرزاتاي جولداسبەكوۆ:

- ءابىلحان قاستەەۆپەن ەتەنە ارالاسپاسام دا تىرىسىندە كوزىن كوردىم. قوي اۋزىنان ءشوپ المايتىن مومىن كىسىنىڭ تۇلا بويىندا ساف تالانتتىڭ تۇنىپ جاتقانى تاڭقالارلىق. ول - قازاقتىڭ رۋحىن كوتەرگەن، قازاقتى الەمگە تانىتقان ازامات. ءبىز مۇنداي ۇلى ونەر يەلەرىن قاستەرلەۋىمىز كەرەك. سوندا عانا بەرەكەلى ەل بولامىز. ءابىلحان اعا ەشقاشان ولمەيدى، حالىقتىڭ كوكەيىندە جارقىراپ قالا بەرەدى، - دەدى.

سول سياقتى مەملەكەت جانە قوعام قايراتكەرى قۋانىش سۇلتانوۆ، قازاقستان سۋرەتشىلەر وداعىنىڭ باسقارما توراعاسى ومىربەك جۇبانيازوۆ، كورنەكتى سۋرەتشىنىڭ قىزى گۇلداريا قاستەەۆا دا كوپشىلىككە ارناپ مەرەكەلىك لەبىزىن ءبىلدىردى. بۇل رەتتە جۋرناليستەرمەن تىلدەسكەن ءابىلحان قاستەەۆتىڭ نەمەرەسى ساۋران قاستەەۆ اتاسىنىڭ جولىن قۋىپ، كوركەمسۋرەت ونەرىن تاڭداعانىن ايتادى.

- ءبىز كىشكەنتايىمىزدان اتامىزدىڭ بارلىق كارتينالارىن كورىپ-ءبىلىپ وستىك. سونىڭ ىشىندە ماعان اكۆارەلمەن سالعان تاۋلاردىڭ كارتيناسى كەرەمەت ۇنايتىن. وسە كەلە سۋرەتشىلىك ونەرگە بەت بۇردىم. قازىر كەسكىندەمە، گرافيكا، يلليۋستراتسيا باعىتتارىندا جۇمىس جاسايمىن. ءابىلحان اتامىزدىڭ ەڭبەگى باعالانىپ، حالىقتىڭ قۇرمەتىنە بولەنىپ جاتقانى - ءبىز ءۇشىن ماقتانىش، - دەيدى ساۋران قاستەەۆ. 

ەسكەرتكىشتىڭ اشىلۋىنان كەيىن قوناقتار كوركەمونەر گالەرەياسىنىڭ ىشىندە ءا.قاستەەۆتىڭ 120 جىلدىعىنا ارنالعان ەكسپوزيتسيالىق كورمەنى تاماشالاپ، سۋرەتشىنىڭ 9 كارتيناسىنىڭ تۇپنۇسقاسىن كوردى. بۇدان ءارى مەرەيتويلىق جيىن ءى. جانسۇگىروۆ اتىنداعى مادەنيەت سارايىندا «تۇعىرى بيىك تاۋ تۇلعا» اتتى رەسپۋبليكالىق كونفەرەنتسيامەن جالعاستى. كونفەرەنتسياعا جينالعان قاۋىمدى وبلىس اكىمى بەيبىت يساباەۆ قۇتتىقتادى. باسقوسۋدا قازاقستاننىڭ حالىق جازۋشىسى بەكسۇلتان نۇرجەكەۇلى، قازاقستان سۋرەتشىلەر وداعىنىڭ مۇشەلەرى جانە قازاقستاننىڭ ەڭبەك سىڭىرگەن قايراتكەرلەرى ماحامبەت سەيسەنحان، جانۇزاق ءمۇساپىر، ونەرتانۋشى ايگەرىم ەسپەنوۆا، ءا.قاستەەۆ مۋزەي-ءۇيىنىڭ جەتەكشىسى، قاستەەۆتانۋشى، قازاقستاننىڭ ەڭبەك سىڭىرگەن قايراتكەرى ەركىن نۇرازحان، ءا. قاستەەۆ اتىنداعى مەملەكەتتىك ونەر مۋزەيىنىڭ ديرەكتورى گۇلايىم جۇمابەكوۆا بايانداما جاساپ، حالىق سۋرەتشىسىنىڭ ەڭبەكتەرىندەگى ەتنوگرافيالىق باعىتتارعا توقتالدى، ونىڭ بۇگىنگى سۋرەت ونەرىنىڭ دامۋىنا تيگىزگەن ىقپالى تۋرالى ءسوز قوزعادى. سونداي-اق ساحنا تورىندە مەرەيتويعا ارناپ شىعارىلعان قىلقالام شەبەرىنىڭ ءومىرى مەن ونەر جولىنا قاتىستى «ءابىلحان قاستەەۆ»، «ءومىر مەكتەبى» كىتاپتارىنىڭ تۇساۋى كەسىلدى. اتاپ وتسەك، ەرتەڭ قاستەەۆتىڭ تۋعان جەرى پانفيلوۆ اۋدانى شەجىن اۋىلىندا سۋرەتشىلەردىڭ رەسپۋبليكالىق پلەنەرى باستالادى. وعان ەلىمىزدىڭ 20-عا جۋىق كاسىبي سۋرەتشىسى قاتىسادى. پلەنەر 10 قازانعا دەيىن جالعاسىپ، شارا جاركەنت قالاسىنداعى كوركەمونەر گالەرەياسىندا قاتىسۋشىلاردىڭ ەڭبەكتەرىنىڭ كورمەسىمەن قورىتىندىلانادى.  

جەتىسۋ وبلىسى اكىمىنىڭ ءباسپاسوز قىزمەتى.

سۋرەتتەردى تۇسىرگەن: جەڭىس ىسقاباي