Qola müsın Körkemöner galereiasynyŋ aulasyna qoiyldy. Suretşınıŋ 120 jyldyǧyna arnalǧan būl mereke eskertkıştıŋ şymyldyǧyn tüsırıp, aldyna gül şoqtaryn qoiudan bastaldy. Mereitoilyq şaralarǧa Jetısu oblysynyŋ äkımı Beibıt İsabaev, memleket jäne qoǧam qairatkerlerı Myrzatai Joldasbekov, Quanyş Sūltanov, Qazaqstannyŋ Halyq jazuşysy Beksūltan Nūrjekeev, körnektı qylqalam şeberınıŋ qyzy Güldariia Qasteeva, Qazaqstan Suretşıler odaǧynyŋ basqarma töraǧasy Ömırbek Jūbaniiazov, ziialy qauym ökılderı, jalpy oblys jūrtşylyǧy qatysty. Qūttyqtau söz alǧan Jetısu oblysynyŋ äkımı Beibıt İsabaev mereitoilyq şaralardyŋ män-maŋyzyna toqtaldy: - Jetısu – qaşanda qasiettı önerdıŋ kielı besıgı bolǧan ölke. Osy öŋırdıŋ töl perzentterınıŋ bırı de bıregeiı Äbılhan atamyz – qazaq halqynyŋ käsıpqoi körkemsuret önerınıŋ tūma bastauy, tūŋǧyş suretşısı. Ol suret önerınde qarapaiym ömır filosofiiasyna,  ūlttyq dünietanymǧa arqa süiedı, sol arqyly tuǧan halqynyŋ tarihy men ömır saltyn beinelep berdı. Ömır qysqa bolǧanmen, öner mäŋgılık. Qanşa ǧasyr ötse de, Äbılhan Qasteevtıŋ esımı tarihta altyn ärıptermen jazylyp, suretşınıŋ bai mūrasy eldıŋ asyl qazynasy retınde ūrpaqtan ūrpaqqa jete beretını sözsız, - degen B. İsabaev eskertkıştegı suretşı beinesın jetkızu ideiasynyŋ avtory körnektı ǧalym Myrzatai Joldasbekovke, müsınşıler Rinat Abenov pen Erbol Ziiabekovke jetısulyqtardyŋ atynan şynaiy rizaşylyǧyn bıldırdı. Mūnan soŋ söz alǧan körnektı memleket jäne qoǧam qairatkerı, Ūlttyq ǧylym akademiiasynyŋ  akademigı Myrzatai Joldasbekov:

- Äbılhan Qasteevpen etene aralaspasam da tırısınde közın kördım. Qoi auzynan şöp almaityn momyn kısınıŋ tūla boiynda saf talanttyŋ tūnyp jatqany taŋqalarlyq. Ol - qazaqtyŋ ruhyn kötergen, qazaqty älemge tanytqan azamat. Bız mūndai ūly öner ielerın qasterleuımız kerek. Sonda ǧana berekelı el bolamyz. Äbılhan aǧa eşqaşan ölmeidı, halyqtyŋ kökeiınde jarqyrap qala beredı, - dedı.

Sol siiaqty memleket jäne qoǧam qairatkerı Quanyş Sūltanov, Qazaqstan Suretşıler odaǧynyŋ basqarma töraǧasy Ömırbek Jūbaniiazov, körnektı suretşınıŋ qyzy Güldariia Qasteeva da köpşılıkke arnap merekelık lebızın bıldırdı. Būl rette jurnalistermen tıldesken Äbılhan Qasteevtıŋ nemeresı Sauran Qasteev atasynyŋ jolyn quyp, körkemsuret önerın taŋdaǧanyn aitady.

- Bız kışkentaiymyzdan atamyzdyŋ barlyq kartinalaryn körıp-bılıp östık. Sonyŋ ışınde maǧan akvarelmen salǧan taulardyŋ kartinasy keremet ūnaityn. Öse kele suretşılık önerge bet būrdym. Qazır keskındeme, grafika, illiustrasiia baǧyttarynda jūmys jasaimyn. Äbılhan atamyzdyŋ eŋbegı baǧalanyp, halyqtyŋ qūrmetıne bölenıp jatqany - bız üşın maqtanyş, - deidı Sauran Qasteev. 

Eskertkıştıŋ aşyluynan keiın qonaqtar Körkemöner galereiasynyŋ ışınde Ä.Qasteevtıŋ 120 jyldyǧyna arnalǧan ekspozisiialyq körmenı tamaşalap, suretşınıŋ 9 kartinasynyŋ tūpnūsqasyn kördı. Būdan ärı mereitoilyq jiyn I. Jansügırov atyndaǧy Mädeniet saraiynda «Tūǧyry biık tau tūlǧa» atty respublikalyq konferensiiamen jalǧasty. Konferensiiaǧa jinalǧan qauymdy oblys äkımı Beibıt İsabaev qūttyqtady. Basqosuda Qazaqstannyŋ Halyq jazuşysy Beksūltan Nūrjekeūly, Qazaqstan Suretşıler odaǧynyŋ müşelerı jäne Qazaqstannyŋ eŋbek sıŋırgen qairatkerlerı Mahambet Seisenhan, Janūzaq Müsäpır, önertanuşy Äigerım Espenova, Ä.Qasteev muzei-üiınıŋ jetekşısı, qasteevtanuşy, Qazaqstannyŋ eŋbek sıŋırgen qairatkerı Erkın Nūrazhan, Ä. Qasteev atyndaǧy memlekettık öner muzeiınıŋ direktory Gülaiym Jūmabekova baiandama jasap, Halyq suretşısınıŋ eŋbekterındegı etnografiialyq baǧyttarǧa toqtaldy, onyŋ bügıngı suret önerınıŋ damuyna tigızgen yqpaly turaly söz qozǧady. Sondai-aq sahna törınde mereitoiǧa arnap şyǧarylǧan qylqalam şeberınıŋ ömırı men öner jolyna qatysty «Äbılhan Qasteev», «Ömır mektebı» kıtaptarynyŋ tūsauy kesıldı. Atap ötsek, erteŋ Qasteevtıŋ tuǧan jerı Panfilov audany Şejın auylynda suretşılerdıŋ respublikalyq plenerı bastalady. Oǧan elımızdıŋ 20-ǧa juyq käsıbi suretşısı qatysady. Plener 10 qazanǧa deiın jalǧasyp, şara Jarkent qalasyndaǧy Körkemöner galereiasynda qatysuşylardyŋ eŋbekterınıŋ körmesımen qorytyndylanady.  

Jetısu oblysy äkımınıŋ baspasöz qyzmetı.

Suretterdı tüsırgen: Jeŋıs Ysqabai