كوشپەندىلەر ويىنى. ۇلىتاۋ وبلىسىنىڭ مەرەيىن اسقاقتاتقاندار وڭىرگە ورالدى

V دۇنيەجۇزىلىك كوشپەندىلەر ويىنىندا ۇلىتاۋ وبلىسىنىڭ نامىسىن قورعاعان سپورتشىلار بۇگىن وڭىرگە ورالىپ، ۇلىتاۋ وبلىسى اكىمى بەرىك ابدىعاليۇلىنىڭ قابىلداۋىندا بولدى. ءوڭىر باسشىسى «ۇلى دالا دۇبىرىنەن» ورالعان ازاماتتارعا العىس ءبىلدىرىپ، ىنتالاندىرۋ قاراجاتى سەرتيفيكاتىن تابىس ەتتى. اتاپ ايتار بولساق، دودادا اشىرتمالى ابا گيۋرەشينەن كۇمىس جۇلدەگە يە بولعان عالىموۆ ايدوس قايراتۇلى ۇلىتاۋ وبلىسىنىڭ قۇرمەت گراموتاسىمەن ماراپاتتالىپ، 700 مىڭ تەڭگەلىك اقشالاي سەرتيفيكاتقا، ال ماس-رەستلينگتەن قولا جۇلدەگەرى ءبىرىمجان اسىلمۇرات نۇربولاتۇلى، 500 مىڭ تەڭگەلىك اقشالاي سەرتيفيكاتقا يە بولدى. بۇل تۇرعىدا باپكەرلەر دە ماراپاتسىز قالمادى. ۇلىتاۋ وبلىسىنىڭ قۇرمەت گراموتاسىمەن عالىموۆ ايدوستىڭ جەكە باپكەرى بارمەنوۆ اسىل ماراپاتتالىپ، 350 مىڭ تەڭگەلىك اقشالاي سەرتيفيكاتقا يە بولدى. ءوڭىر باسشىسى ءبىرىمجان اسىلمۇراتتىڭ جەكە باپكەرى ءابدىحاميت اسقارعا دا قۇرمەت گراموتاسىن تابىس ەتىپ، 250 مىڭ تەڭگەلىك اقشالاي سەرتيفيكاتپەن ىنتالاندىردى. كوشپەندىلەر ويىندارىنا ۇلىتاۋ وبلىسىنان سپورتشىلار، باپكەرلەر، كەرۋەن مۇشەلەرى، ونەرپازدار، قولونەرشىلەر، گيد ماماندارى، ۇيىمداستىرۋ القاسىنىڭ مۇشەلەرى، جالپى سانى 150-گە جۋىق ازامات تىكەلەي قاتىستى. كوشپەندىلەر ويىندارىندا باستى قاسيەتتى نىشان جانە نەگىزگى ەلەمەنت سۋ بولدى. ويىندار قارساڭىندا قازاقستاننىڭ بارلىق ءوڭىرىنىڭ قاسيەتتى بۇلاقتارىنان اشىلۋ راسىمىنە اپارىلاتىن سۋ الىندى. «بىرلىك كەرۋەنى» جوباسى اياسىندا قۇرامىندا «باتىر قىز» جانە 10 ەلشىدەن قۇرالعان وبلىسىمىزدىڭ وكىلدەرى ۇلىتاۋداعى تاسبۇلاقتان سۋ الىپ، ونى ەتنواۋىلدىڭ اشىلۋ سالتاناتىندا «تايقازانعا» قۇيۋ راسىمىنە قاتىسىپ، وزدەرىنە جۇكتەلگەن جاۋاپتى ءىستى ابىرويمەن اتقارىپ كەلدى. سونداي-اق، ءىس-شارا اياسىندا استانادا «كوشپەندىلەر الەمى» ەتنواۋىلى بوي كوتەرىپ، ۇلىتاۋ وبلىسى 3 كيىز ءۇيىن تىكتى. وندا ءاربىر كەلۋشى قوناقتارعا قازاق حالقىنىڭ سالت-داستۇرلەرى قويىلىم رەتىندە ۇسىنىلىپ، تۋريستەرگە وبلىسىمىزدىڭ تاريحي-مادەني ورىندارى تانىستىرىلدى. ودان بولەك، ءبىزدىڭ كيىز ۇيلەردىڭ قوناقتارىنا ارناپ 80-گە جۋىق كونە جادىگەر ەكسپوناتتار قويىلدى. دۇنيەجۇزىلىك كوشپەندىلەر ويىندارىنىڭ مادەني كونتسەرتتىك باعدارلاماسى اياسىندا، باستى ساحنادا 100-گە جۋىق ۇلىتاۋ وبلىسىنىڭ ونەرپازدارى «حان وردادان اق ورداعا سالەم» اتتى كونتسەرتتىك باعدارلاماسىن جۇرتشىلىققا ۇسىنىپ، ۇلكەن قوشەمەتكە بولەندى. جەرلەستەرىمىز، ەسترادا جۇلدىزدارى قىدىرالى بولمان، قاراقات ءابىلدينا سەكىلدى ونەر مايتالماندارىنىڭ دا وبلىس شاشباۋىن كوتەرگەنىن ايتا كەتۋىمىز كەرەك.