عىلىم-ءبىلىم، وقۋ-اعارتۋ ءىسى – قاي زاماندا دا، قاي قوعامدا دا ەڭ وزەكتى ماسەلەلەردىڭ ءبىرى. بۇل جولدا توككەن تەر – بولاشاقتىڭ دانەگىنە تامعان ءبىر-ءبىر تامشى ۇلەس.
ءىسىم وڭسىن دەسەڭىز،
سول ءىستىڭ مامانى بولىڭىز.
داڭقىم شىقسىن دەسەڭىز،
كوپشىلىكتىڭ ادامى بولىڭىز، - دەپ ءال-فارابي اتامىز ايتقانداي، «ادىرنا» ءتىلشىسىنىڭ كەزەكتى سۇقباتى ءوز ءىسىنىڭ مامانى بولا بىلگەن ءبىلىم بەرۋ ءىسىنىڭ قۇرمەتتى قىزمەتكەرى، «ىبىراي التىنسارين» توسبەلگىسىنىڭ يەگەرى نازيكەن نۇرلانقىزىمەن بولدى. قىرىق جىلعا تاياۋ ۇستازدىق جانە ديرەكتوردىڭ بەيىندى جۇمىستارى جونىندەگى ورىنباسارى قىزمەتىن اتقارىپ كەلە جاتقان كەيىپكەرىمىز شيەلەنگەن سىردىڭ شەتىن شىعاردى.
— نازيكەن نۇرلانقىزى، وتكەن جىلى بىلگەن ءبىلىم بەرۋ ءىسىنىڭ قۇرمەتتى قىزمەتكەرى اتانساڭىز، بيىل «ىبىراي التىنسارين» توسبەلگىسىنىڭ يەگەرى بولىپ وتىرسىز. قۋانىشتى حاباردى ەڭ ءبىرىنشى كىممەن بولىسەسىز؟
— ۋاقىتىمىزدىڭ باسىم بولىگىن جۇمىستا وتكىزەتىن بولعاسىن بولار، ۋاقىت وتە كەلە جۇمىس ورنى ادامنىڭ اجىراماس بولشەگىنە، جىلى مەكەنىنە اينالادى ەكەن. ونداعى ۇجىمداستاردىڭ دا رۋحاني سىرلاسىڭ، اقىلشىڭ بولۋى زاڭدى. مەكتەپ، ءاربىر ۇستازدىڭ شابىتتاندىرار مەكەنى، قىم-قۋىت تىرلىگى قايناپ جاتقان كىشىگىرىم الەمى. سول تىرلىكتىڭ پۇشپاعىن كىممەن بىرگە يلەپ وتىرساڭ سول ىستىق بولىپ تا كەتەدى، سوندىقتان بولار بۇل قۋانىشتى جاڭالىقتى اۋەلى احمەت بايتۇرسىنوۆ اتىنداعى № 139 مەكتەپ-گيمنازيا ديرەكتورى ەرىك نۇرعۇمارۇلىمەن، سودان سوڭ اكىمشىلىك مۇشەلەرىمەن ءبولىستىم. كەشكە تامان ءاردايىم قولداۋشىم، مەنىڭ جەتىستىگىمە ەكى ەسە قۋانار جاناشىر جولداسىممەن ءبولىستىم، كەيىن قىزعالداعىم، گۇلىم قىزىما حابارلادىم. ءسويتىپ ارى قاراي ۇجىم ەستىدى قۇتتىقتاۋلار تولاسسىز كەلىپ جاتتى.
- جاقسى مامان بولۋ ءۇشىن نەنى ءبىلۋ جانە ۇيرەنۋ قاجەت؟
– ءار ماماندىق ءوز الدىنا ءبىر مەكتەپ، كەي ماماندىق ادامنىڭ مىنەزىن وزىنە يكەمدەپ وتكىر دە قاتىگەز ادام جاساپ جاتادى، ال ءبىزدىڭ ماماندىقتىڭ جايى مۇلدە باسقا. ءبىزدىڭ ماماندىق اۋەلى ادام جانىن زەرتتەۋمەن اينالىسۋدى ۇيرەتەدى. پەداگوگيكالىق ەتيكەتتى ساقتاي وتىرىپ، وقۋشىنى جۇمىس جاساۋعا، ءبىلىم يگەرۋگە باۋلي ءبىلۋ ناعىز شەبەرلىك دەپ ويلايمىن. مەن ءۇشىن وقۋشىمەن بولسىن، ۇجىممەن بولسىن ادامگەرشىلىك، جاۋاپكەرشىلىك، ادام اقىسى دەگەن قاعيدالاردى ويلاي وتىرىپ قارىم-قاتىناس ورناتا بىلگەن مامان جاقسى مامان.
- ءسىزدى وسىنداي قۇرمەت پەن ابىرويعا جەتكىزگەن ۇستانىمىڭىز جايلى ايتىپ بەرسەڭىز.
— ەڭ العاش ەڭبەك جولىن باستاعاننان بەرى 30 جىلدان استام ۋاقىت ءوتىپتى. جاس مامان بولىپ جۇرگەندە-اق مەنىڭ ويىمدا اتاق-داڭقتى ۇستاز بولۋ ەمەس، ابىرويلى ۇستاز بولۋ ۇعىمى قۇرمەتتى ءارى سۇيكىمدى ەدى. ابىرويدى ەشقانداي قاعاز، ەشقانداي ءتوس بەلگى بەرە المايدى عوي. بۇگىنگى كۇنى الىپ وتىرعان قۇرمەت توسبەلگىسى مەن كۋالىگى مەنىڭ 30 جىل بويعى ۇستازدىق جولىم مەن باسقارۋ ىسىندەگى ەڭبەگىمنىڭ ايعاعى ىسپەتتى، ال ۇجىمنىڭ قۇرمەتى مەن ابىرويى كوڭىل ارقىلى سەزىلەتىن دۇنيە. ال ۇستازدىڭ ۇمتىلۋى ءتيىس بيىكتىك، ۇستانىمىن ۇشتاپ وتىراتىن قايراتى شاكىرتتىڭ قۇرمەتىندە جاتىر. مەنىڭ ۇستانىمىم سول شاكىرتتىڭ كوز الدىندا ابىرويلى ۇستاز بەينەسىندە جاتتالۋ.
- قىزمەت جولىندا قاجىعان، قينالعان، جالىققان ءساتىڭىز بولدى ما؟
— جوق، بىرەۋ سەنەر، بىرەۋ سەنبەس، جالىعىپ تا قاجىپ تا كورمەپپىن. قينالعان ساتتەر ارينە بولدى، قيىندىقسىز جەڭىس پەن ناتيجە بولمايدى، جۇمىس بولعان سوڭ ءبىر جەڭىلىپ، ءبىر جەڭىپ بارىپ تاجىريبە جيناقتايمىز عوي، الايدا سول ۋاقىتتىڭ ءبارى قايتا كەلسە قايتا سولاي جاسار ەدىم دەپ ويلايمىن. ءوز تاجىريبەم مەن قىزمەتىمە كەتكەن ۋاقىتىما وكىنىپ كورمەپپىن، ماماندىق تاڭداۋدا جولى بولعانداردىڭ ءبىرى بولارمىن.
– ورىندالماعان ارمانىڭىز بار ما؟
— كوپ بالالى بولۋ... كوپ بالالى انا بولۋ ارمانىم ەدى عوي، اللاعا شۇكىر قىزىم بار، دەسە دە، «اعايىندى جىگىتتىڭ كەرە قالىس جالى بار، جالعىز باستى جىگىتتىڭ شىعار-شىقپاس جانى بار» دەيدى عوي، سوندىقتان با بالالارىم كوپ اعايىندى بولسا دەپ ارمانداۋشى ەدىم.
- ەسەسىنە «اجەلەگەن» نەمەرەلەرىڭىز كوپ بولسىن دەپ تىلەيمىز، ءار ۇستازدىڭ وزىندىك قىزىعۋشىلىعى مەن شىعارماشىلىق قابىلەتى بار، ءسىزدىڭ قانداي ونەرىڭىز بار، جەزتاڭداي ءانشى دەپ ەستىپ ەدىك قانشالىقتى راس؟
— ەندى جەزتاڭداي ءانشى ەمەسپىن، كوپپەن بىرگە سىزىلتىپ ايتاتىنىم بار، الايدا ءان ايتۋعا كوپ قىزىقپايمىن، بىراق ەستى اندەردى تىڭداعان ۇنايدى. تابيعاتتا، ساياباقتاردا وڭاشا قالىپ، وزىممەن سىرلاسۋدى جانىم سونداي سۇيەدى. تابيعات مەزگىلدەرىنىڭ اۋىسۋى، وزىندىك ادەمىلىگى، تابيعاتتىڭ تىنىشتىڭى، جاپىراقتىڭ ءتۇسۋى، بايشەشەكتىڭ قاردى جارىپ شىعۋى، تاڭعى قۇستاردىڭ شيقىلى، اينەككە قاتقان قىراۋدىڭ سۋرەتى، جاپىراقتارعا بىتكەن شىق، قاردىڭ سىتىرى ءبارى-ءبارىن تاماشالاعان، سالقىن اۋانى تەرەڭ-تەرەڭ تىنىستاعان قاتتى ۇنايدى.
- جاس ماماندارعا بەرەر كەڭەسىڭىز؟
— «ەڭبەك ءبارىن جەڭبەك»، ەڭبەك ەتكەن ادام اللاعا دا ادامعا دا سۇيكىمدى عوي، ەڭبەك ەتىپ جۇرگەن ادام ءتۇپتىڭ تۇبىندە ءسۇت بەتىنە قايماق بولىپ شىعادى، سوندىقتان ەڭبەك ەتۋدە جارىسىڭدار دەگىم كەلەدى، سوندا ناتيجە بولادى.
- سۇقباتتاسۋعا ۋاقىت بولگەنىڭىزگە كوپ-كوپ راحمەت!
