ءبىلىم كۇنى قارساڭىندا جامبىل وبلىسىندا 5 مەكتەپ پايدالانۋعا بەرىلدى, دەپ حابارلايدى adyrna.kz ۇلتتىق پورتالى وبلىس اكىمىنىڭ ءباسپاسوز قىزمەتىنە سىلتەمە جاساپ.
بەس مەكتەپتىڭ ءبىرى جامبىل اۋدانىنا قاراستى بىرلەسۋ-ەڭبەك اۋىلىنداعى 140 ورىندىق ورتا ءبىلىم بەرۋ مەكەمەسى. ءبىلىم كۇنىنە وراي اشىلعان وقۋ ورنىنىڭ العاشقى قوڭىراۋ سالتاناتتى شاراسىنا ايماق باسشىسى اسقار مىرزاحمەتوۆتىڭ ءوزى قاتىسىپ، مەكەمە ۇجىمى مەن وقۋشىلارىنا جاڭا وقۋ جىلىندا جاڭا جەتىستىكتەر مەن ساتتىلىك تىلەدى.
بىرلەسۋ-ەڭبەك ورتا مەكتەبى دەموگرافيالىق وسىمگە بايلانىستى ورىن تاپشىلىعىن جويۋ ماقساتىندا جاڭادان بوي كوتەرىپ وتىر. جاڭا ءبىلىم مەكەمەسىندە بالالاردىڭ ساپالى ءبىلىم الۋلارىنا بارلىق جاعداي جاسالعان. مەكتەپتە 18 وقۋ قابينەتى، سپورت زالى، ءماجىلىس زالى، اسحانا، 2 كومپيۋتەرلىك سىنىپ، روبوتوتەحنيكا جانە جاڭا موديفيكاتسيالىق كابينەتتەر بار. بيىل مەكتەپتە بارلىعى 250 وقۋشى 2 اۋىسىمدا وقىماق. وندا 39 پەداگوگ قىزمەت ەتسە، ونىڭ 12,5 پايىزى جاس ماماندار.
ايتا كەتەيىك، جامبىلدىقتار جاڭا وقۋ جىلىن جاڭا لەپپەن باستاماق. وڭىردە جىل سايىن جاڭا مەكتەپ پەن بالاباقشالار قۇرىلىسى قارقىن الىپ كەلەدى دەسەك، بۇگىنگى العاشقى قوڭىراۋ كۇنى وبلىس بويىنشا 5 مەكتەپتىڭ پايدالانۋعا بەرىلىپ وتىرعاندىعى سونىڭ ايعاعى. ونىڭ 1-ءۋى ءۇش اۋىسىمدى، 1-ءۋى اپاتتى جانە 3-ءۋى ورىن تاپشىلىعى بار مەكتەپتىڭ ماسەلەسىن شەشىپ وتىر. قازىرگى تاڭدا وڭىردەگى ءۇش اۋىسىمدى مەكتەپتەردىڭ ماسەلە ءتۇيىنى تولىعىمەن تارقاتىلعان.
سونىمەن قاتار جىل سوڭىنا دەيىن تاعى دا 4 نىسان پايدالانۋعا بەرىلەدى. قالعان اپاتتى جانە ورىن تاپشىلىعى بار مەكتەپتەردىڭ قۇرىلىسىن جۇرگىزۋگە وبلىستىق بيۋدجەتتەن قارجى ءبولىنىپ، ماسەلەسى كەزەڭ-كەزەڭىمەن شەشىلەتىن بولادى. بيىل وبلىستىڭ ءبىلىم جۇيەسىن قارجىلاندىرۋعا 130 ميلليارد تەڭگە بولىنسە، بۇل وتكەن جىلمەن سالىستىرعاندا 22,2 ميلليارد تەڭگەگە ارتىق. ونىڭ 5,1 ميلليارد تەڭگەسى ءبىلىم بەرۋ نىساندارىنىڭ قۇرىلىسى مەن كۇردەلى جوندەۋگە قاراستىرىلعان. بۇگىندە 15 ءبىلىم نىسانىنىڭ قۇرىلىسى جۇرگىزىلۋدە.
بيىل جامبىل وبلىسىندا ءبىرىنشى سىنىپقا 28 مىڭ وقۋشى قابىلداندى. ال رەسپۋبيكا بويىنشا 400 مىڭنان استام بالا مەكتەپ تابالدىرىعىن اتتادى. جالپى جىل وتكەن سايىن ءبىرىنشى سىنىپقا باراتىن وقۋشىلاردىڭ سانى ارتىپ كەلەدى. 2016 جىلى 1-سىنىپقا بارعان بالالاردىڭ 89 پايىزى قازاق مەكتەبىن تاڭداعان. بۇل كورسەتكىش سوڭعى 3 جىلدان بەرى كوبەيمەسە ازايعان جوق دەپ سەنەمىز.
«ادىرنا»
ۇلتتىق پورتالى
