«ءار ينگۋش قازاق حالقىنا العىس بىلدىرەدى»

استاناعا ينگۋشەتيا رەسپۋبليكاسى ۇكىمەتى توراعاسىنىڭ ءبىرىنشى ورىنباسارى ماگومەد ەۆلوەۆ باستاعان ءبىر توپ دەلەگاتسيا ارنايى كەلىپ، قوناق بولدى. ولار ەلوردامىزداعى «قازاق ەلىنە مىڭ العىس» مونۋمەنتى، قر قارۋلى كۇشتەرىنىڭ اسكەري-تاريحي مۋزەيى جانە استاناداعى رەسپۋبليكالىق باس مەشىتتە بولدى. سونداي-اق قوناقتار «دوستىق» ۇيىنە بارىپ، ورتالىقتىڭ تىنىس-تىرشىلىگىمەن تانىستى. القالى جيىنعا «ۆايناح» شەشەن-ينگۋش ەتنوبىرلەستىگىنىڭ قۇرمەتتى توراعاسى سالمان گەروەۆ جانە قحا-نىڭ شەشەن-ينگۋش ەتنو-بىرلەستىگىنىڭ وكىلدەرى قاتىستى. «دوستىق» ۇيىندەگى ءىس-شارانى استانا قالاسى ىشكى ساياسات باسقارماسى باسشىسىنىڭ ورىنباسارى ءلاززات قۇسايىنوۆا اشىپ جۇرگىزدى. سونداي-اق ول ينگۋشەتيادان كەلگەن قوناقتاردى ەتنو-مادەني بىرلەستىكتەردىڭ كابينەتتەرى مەن قازاقستان حالقى اسسامبلەياسىنىڭ جۇمىسىمەن تانىستىردى. «ينگۋشەتيا رەسپۋبليكاسىنان ارنايى كەلگەن دەلەگاتسيا ەلوردانىڭ كورىكتى جەرلەرىن ارالادى. ناقتىراق ايتسام، قۇرمەتتى قوناقتاردى «قازاق ەلىنە مىڭ العىس» مونۋمەنتى، قر قارۋلى كۇشتەرىنىڭ اسكەري-تاريحي مۋزەيى جانە استاناداعى رەسپۋبليكالىق باس مەشىت جانە «دوستىق» ءۇيىنىڭ قىزمەتىمەن تانىستىردىق. سونىمەن قاتار دەلەگاتسيا وكىلدەرى استاناداعى شەشەن-ينگۋش ەتنوبىرلەستىگىنىڭ «ۆايناح» حالىق ءانسامبلىنىڭ ونەرىن تاماشالادى. انسامبل ارتىستەرى كورەرمەندەرگە مەرەكەلىك كوڭىل-كۇي مەن ۇمىتىلماس اسەر سىيلادى»، - دەدى ءلاززات قۇسايىنوۆا. ينگۋشەتيا رەسپۋبليكاسى ۇكىمەتى توراعاسىنىڭ ءبىرىنشى ورىنباسارى ماگومەد ەۆلوەۆ بۇل ساپاردىڭ ەرەكشە بولعانىن ايتادى. «مەن قازاق ەلىنە ءبىرىنشى رەت كەلىپ تۇرمىن. بۇگىن ەكىنشى كۇن استانادا بولساق تا، ءوزىمىزدى 1 اي ءارى ءوز ۇيىمىزدە جۇرگەندەي سەزىنۋدەمىز. ءار ينگۋش قازاق حالقىنا العىس بىلدىرەدى. سەبەبى بۇگىنگى تاڭدا ءبىزدىڭ ۇلت قازاق ەلىنىڭ ارقاسىندا تامىرىن تەرەڭگە جايدى. ەگەر وسىدان 80 جىل بۇرىن قۇشاعىن جايىپ قارسى الماسا، وندا بۇگىندە ءبىزدىڭ ۇلت بولماۋشى ەدى»، - دەدى ماگومەد ەۆلوەۆ. ال «ۆايناح» شەشەن-ينگۋش ەتنوبىرلەستىگىنىڭ قۇرمەتتى توراعاسى سالمان گەروەۆ بولسا، قازاق ەلىندە ءار ءتۇرلى ۇلت وكىلدەرى تاتۋ-ءتاتتى عۇمىر كەشىپ جاتقانىن ايتتى. «ۇلتتىڭ تاريح ساحناسىنان جويىلىپ كەتۋىنە جەرگىلىكتى قازاقتار مۇمكىندىك بەرمەدى. ءبىزدى كەۋدەمىزدەن يتەرمەي، كەرىسىنشە دوستىق قولىن سوزعانى ءۇشىن «راقمەت» ايتۋدان جالىقپايمىز. ءبىز قازاق حالقىنىڭ ۇلدارى مەن قىزدارىنىڭ مەيىرىمدىلىگى مەن جومارتتىعىن ەشقاشان ۇمىتپايمىز. ءبىز قازاقستاندا وزگەلەرمەن تەڭ دارەجەدە ءومىر سۇرۋدەمىز. وسىلاردى ارنايى كەلگەن دەلەگاتسيا مۇشەلەرىنە ايتىپ جاتىرمىز»، - دەدى سالمان گەروەۆ.