«Är inguş qazaq halqyna alǧys bıldıredı»

Astanaǧa İnguşetiia Respublikasy Ükımetı töraǧasynyŋ bırınşı orynbasary Magomed Evloev bastaǧan bır top delegasiia arnaiy kelıp, qonaq boldy. Olar elordamyzdaǧy «Qazaq elıne myŋ alǧys» monumentı, QR Qaruly Küşterınıŋ äskeri-tarihi muzeiı jäne Astanadaǧy Respublikalyq Bas meşıtte boldy. Sondai-aq qonaqtar «Dostyq» üiıne baryp, ortalyqtyŋ tynys-tırşılıgımen tanysty. Alqaly jiynǧa «Vainah» şeşen-inguş etnobırlestıgınıŋ qūrmettı töraǧasy Salman Geroev jäne QHA-nyŋ şeşen-inguş etno-bırlestıgınıŋ ökılderı qatysty. «Dostyq» üiındegı ıs-şarany Astana qalasy Işkı saiasat basqarmasy basşysynyŋ orynbasary Läzzat Qūsaiynova aşyp jürgızdı. Sondai-aq ol İnguşetiiadan kelgen qonaqtardy etno-mädeni bırlestıkterdıŋ kabinetterı men Qazaqstan halqy Assambleiasynyŋ jūmysymen tanystyrdy. «İnguşetiia Respublikasynan arnaiy kelgen delegasiia elordanyŋ körıktı jerlerın aralady. Naqtyraq aitsam, qūrmettı qonaqtardy «Qazaq elıne myŋ alǧys» monumentı, QR Qaruly Küşterınıŋ äskeri-tarihi muzeiı jäne Astanadaǧy Respublikalyq Bas meşıt jäne «Dostyq» üiınıŋ qyzmetımen tanystyrdyq. Sonymen qatar delegasiia ökılderı Astanadaǧy şeşen-inguş etnobırlestıgınıŋ «Vainah» halyq ansamblınıŋ önerın tamaşalady. Ansambl ärtısterı körermenderge merekelık köŋıl-küi men ūmytylmas äser syilady», - dedı Läzzat Qūsaiynova. İnguşetiia Respublikasy Ükımetı töraǧasynyŋ bırınşı orynbasary Magomed Evloev būl sapardyŋ erekşe bolǧanyn aitady. «Men Qazaq elıne bırınşı ret kelıp tūrmyn. Bügın ekınşı kün Astanada bolsaq ta, özımızdı 1 ai ärı öz üiımızde jürgendei sezınudemız. Är inguş qazaq halqyna alǧys bıldıredı. Sebebı bügıngı taŋda bızdıŋ ūlt qazaq elınıŋ arqasynda tamyryn tereŋge jaidy. Eger osydan 80 jyl būryn qūşaǧyn jaiyp qarsy almasa, onda bügınde bızdıŋ ūlt bolmauşy edı», - dedı Magomed Evloev. Al «Vainah» şeşen-inguş etnobırlestıgınıŋ qūrmettı töraǧasy Salman Geroev bolsa, Qazaq elınde är türlı ūlt ökılderı tatu-tättı ǧūmyr keşıp jatqanyn aitty. «Ūlttyŋ tarih sahnasynan joiylyp ketuıne jergılıktı qazaqtar mümkındık bermedı. Bızdı keudemızden itermei, kerısınşe dostyq qolyn sozǧany üşın «raqmet» aitudan jalyqpaimyz. Bız qazaq halqynyŋ ūldary men qyzdarynyŋ meiırımdılıgı men jomarttyǧyn eşqaşan ūmytpaimyz. Bız Qazaqstanda özgelermen teŋ därejede ömır sürudemız. Osylardy arnaiy kelgen delegasiia müşelerıne aityp jatyrmyz», - dedı Salman Geroev.