قازاقستاننىڭ بۇرىنعى باسشىسى نۇرسۇلتان نازارباەۆتىڭ ۇلكەن قىزى داريعانىڭ تاعى مۇلكى – ماسكەۋدەگى سوۆەت كەزىنەن قالعان پاتەرى. وسى تۋرالى حابارلاعان اقپارات رەسۋرسىنىڭ مالىمەتىن ازىرگە ەشكىم جوققا شىعارعان جوق. بۇعان دەيىن دە اكتيۆتەرگە قاتىستى مالىمەتتەر جاريالانىپ، سۇراقتار پايدا بولعاندا بۇرىنعى باسشىنىڭ اۋلەتى ءتىس جارىپ ەشتەڭە ايتقان ەمەس.
«ءبىز داريعا نازارباەۆانىڭ ماسكەۋدەن تاعى ءبىر پاتەرىن تاپتىق. بۇل شەتەلدەگى باسقا مۇلىكتەرىنە قاراعاندا ەرەكشە كوزگە تۇسەدى. سەبەبى، بىرىنشىدەن، بۇل ونىڭ ەڭ ارزان اكتيۆى، ەكىنشىدەن، ونى تەگىن العان»، - دەپ حابارلادى «ۆىحود ك موريۋ» Telegram ارناسى. وسى ارنانىڭ حابارلاۋىنشا، رەسەي استاناسىندا داريعا نازارباەۆانىڭ بۇدان الدەقايدا قىمبات مۇلىكتەرى دە بار.
اتادان قالعان مۇرا ما؟
اڭگىمە بار-جوعى 66 م² بولاتىن ءۇش بولمەلى پاتەر تۋرالى بولىپ وتىر. پاتەر چەرەمۋشكي اۋدانىنداعى پروفسويۋزنايا كوشەسىندە «تسارسكوە سەلو» تۇرعىن الابىندا ورنالاسقان. بۇل كەشەن 1983 جىلى «كەڭەستىك شەنەۋنىكتەرگە ارنالعان ەليتالىق تۇرعىن ءۇي» رەتىندە سالىنعان. جەرگىلىكتى تۇرعىندار بۇل ۇيلەردى ءالى كۇنگە دەيىن «سوۆميندىك» دەپ اتايدى.
№2 كورپۋستاعى بەسىنشى قاباتتاعى پاتەرگە الدىمەن ۇكىمەتتى، سودان كەيىن قازاقستان كومپارتياسىنىڭ ورتالىق كوميتەتىن باسقارعان كسرو مينيسترلەر كەڭەسىنىڭ مۇشەلەرىنىڭ ءبىرى نۇرسۇلتان نازارباەۆ قونىستانعان.
«ول بۇل جەردە ۋاقىتشا عانا بولعان. كوبىنەسە ماسكەۋ مەملەكەتتىك ۋنيۆەرسيتەتىنىڭ تاريح فاكۋلتەتىنىڭ اسپيرانتى قىزى داريعا تۇردى»، - دەپ جازادى «ۆىحود ك موريۋ».
1992 جىلى نازارباەۆ ءوزىنىڭ قىزمەتتىك پاتەرىن جەكەشەلەندىرىپ، ونى داريعا جانە ونىڭ ۇلدارى ءنۇرالى مەن ايسۇلتانعا ءبولىپ بەردى.
«جەكەشەلەندىرۋ، شاماسى، قىزمەتتىك تۇرعىن ۇيگە جانە تەك رەسەي ازاماتتارىنا قاتىستى زاڭدى اينالىپ وتكەن سياقتى. قالاي بولعاندا دا، بۇل ولاردىڭ العاش شەتەلدەن يەلەنگەن مۇلكى بولدى»، - دەپ حابارلايدى «ۆىحود ك موريۋ».
ءدال وسى پاتەردىڭ قۇنى نازارباەۆتىڭ باسقا مۇلىكتەرىمەن سالىستىرعاندا وتە ارزان. مالىمەتتەر بويىنشا، وسى ۇيدە ەكى قابات جوعارى ورنالاسقان ۇقساس پاتەر 28 ميلليون رۋبلگە (شامامەن 300 مىڭ دوللاردان از) ساتىلىپ جاتىر.
تاعى ءبىر پاتەر
«300 مىڭ دوللاردى ارزان دەپ ايتقاندا، ءبىز بۇل پاتەردى بۇرىن-سوڭدى رەسمي تۇردە بيزنەسپەن اينالىسپاعان داريعانىڭ باسقا ساتىپ العان مۇلىكتەرىمەن سالىستىرىپ وتىرمىز. ونىڭ ماسكەۋدە قۇنى 230 ميلليون رۋبل (2,3 ميلليون دوللار) تۇراتىن تاعى ءبىر پاتەرى بار. بۇل پاتەردىڭ ورنالاسقان جەرى دە ەرەكشە — قالانىڭ قاق ورتاسىنداعى پوۆارسكايا كوشەسىندە، ال اۋماعى 305 م²»، - دەپ اتاپ ءوتتى Telegram ارنا اۆتورلارى.
چەرەمۋشكيدەگى «كوزگە قوراش» پاتەردىڭ ءالى كۇنگە دەيىن نازارباەۆتىڭ قىزىنىڭ اتىندا ەكەنى حابارلاندى. جەكەشەلەندىرۋدەن كەيىن يەلەرى وزگەرمەگەن.
«مۇمكىن، بۇل ءۇش بولمەلى پاتەر داريعا نازارباەۆا ءۇشىن ەستەلىك نەمەسە بويتۇمار رەتىندە قىمبات شىعار. ماسكەۋدە بولسا دا، ءوزىنىڭ العاشقى شەتەلدىك مۇلكى…» — دەپ جازادى «ۆىحود ك موريۋ».
ەسكە سالايىق، 2022 جىلى داريعا نازارباەۆا بەيكەر-ستريتتەگى اكتيۆتەرىن 140 ميلليون دوللارعا ساتقان بولاتىن. ول سونداي-اق لوندوننىڭ ەڭ ءساندى اۋداندارىنىڭ ءبىرى حايگەيتتە ورنالاسقان ۆيللاسىن 8 ميلليون فۋنت ستەرلينگكە ساتتى.
«لوندوندا، ميللياردەرلەر كوشەسى سانالاتىن بيشوپ-اۆەنيۋدەگى داريعانىڭ تاعى ءبىر سارايى 39 ميلليون فۋنت تۇرادى. سونىمەن قاتار، داريعا نازارباەۆا لوندوننىڭ چەلسي اۋدانىنداعى مانرەسا روۋد كوشەسىندەگى 21 ۇيدەن قۇنى 31 ميلليون فۋنت بولاتىن ءبىر ۇلكەن پاتەرگە يەلىك ەتەدى»، - دەپ حابارلادى «ۆىحود ك موريۋ» Telegram ارناسى نازارباەۆانىڭ لوندوندا ورنالاسقان جىلجىمايتىن مۇلىگى جايلى.
