13 جاستاعى ءجاسوسپىرىم قوستاناي وبلىسىنداعى قارابالىق اۋدانىندا توعىزاق وزەنىندە بالىق اۋلاۋ كەزىندە سۋعا باتىپ كەتكەن، دەپ حابارلايدى "ادىرنا" ۇلتتىق پورتالى.
قر تجم اقپاراتىنا سايكەس، بالا 16 قاراشا كۇنى ساعات 16:30 شاماسىندا بالىق اۋلاۋعا شىققان، بىراق ۇيىنە ورالماعان.
"بالانى ىزدەۋگە تجد قىزمەتكەرلەرى، پوليتسيا، ەرىكتىلەر مەن جوعالعان بالانىڭ تۋىستارى، سونداي-اق كينولوگيالىق توپتار قاتىستى. جەدەل قۇتقارۋ جۇمىستارىن جۇرگىزۋ مەن ەرىكتىلەردىڭ كومەگىنە قاراماستان، قايعىلى جاعدايدان قاشىپ قۇتىلۋ مۇمكىن بولمادى. ءجاسوسپىرىمنىڭ دەنەسى تابىلىپ، سۋ بەتىنە شىعارىلدى", – دەپ حابارلادى تجم.قوستاناي وبلىسى توتەنشە جاعدايلار دەپارتامەنتى قايتىس بولعان بالانىڭ تۋىستارى مەن جاقىندارىنا تەرەڭ قايعىرىپ كوڭىل ايتادى. قۇتقارۋشىلار بالىق اۋلاۋ كەزىندە قاۋىپسىزدىك ەرەجەلەرىن قاتاڭ ساقتاۋ قاجەتتىگىن ەسكە سالادى. اتاپ ايتقاندا، جاسوسپىرىمدەردى ەرەسەكتەردىڭ باقىلاۋىنسىز سۋ ايدىندارىنا جىبەرۋگە بولمايدى، اسىرەسە سۋ تەمپەراتۋراسى تومەن جانە قاۋىپ جوعارى جاعدايدا.
