بۇگىن تۇركىستاندا «BASTAU TALKS» قوعامدىق لەكتسياسى اياسىندا اكتريسا، جۇرگىزۋشى، بلوگەر جازيرا ەركىن مەن اكتيور، جۇرگىزۋشى، بلوگەر يسرايل داۋلەت، سونىمەن قاتار اقىن، جۋرناليست، رەسپۋبليكالىق، ايماقتىق جىر ءمۇشايرالارىنىڭ جۇلدەگەرى، «دۇنيەگە كەلەر ءالى تالاي قاسىم» ءمۇشايراسىنىڭ جەڭىمپازى باۋىرجان ەرمان «دوستىق ءۇيى» عيماراتىندا جاستارمەن كەزدەستى.
جازيرا ەركىن شىعارماشىلىق جولىنداعى العاشقى قادامدارى، اكتەرلىك ونەردەگى قيىندىقتار مەن جەڭىستەر، بلوگەرلىكتىڭ قازىرگى قوعامداعى ءرولى تۋرالى بايانداپ، جاستارعا ءاردايىم ىزدەنىستە بولۋدى ۇسىندى. ول ءوز تاجىريبەسىندە كەزدەسكەن قيىندىقتاردى جەڭۋدىڭ ماڭىزىن اتاپ ءوتىپ، ءار جەتىستىككە تاباندىلىق پەن ەڭبەك ارقىلى جەتۋگە بولاتىنىن ايتتى.
يسرايل داۋلەت جۋرناليستيكا جانە مەديا سالاسىندا جۇمىس ىستەۋ تاجىريبەسىمەن ءبولىسىپ، ءارتۇرلى جوبالارداعى بەلسەندىلىگى، اكتەرلىك شەبەرلىكتى دامىتۋداعى قادامدارى تۋرالى ءسوز قوزعادى. ول جاستاردى ءوز ماقساتتارىن ايقىنداپ، سەنىممەن ارەكەت ەتۋگە شاقىرىپ، مەديا مەن ونەر سالاسىنداعى مۇمكىندىكتەردىڭ كەڭدىگىن اتاپ ءوتتى.
باۋىرجان ەرمان شىعارماشىلىق شابىت پەن اقىندىق ونەردىڭ قوعامداعى ءرولى تۋرالى اڭگىمەلەدى. ول ولەڭ جازۋدىڭ ىشكى تۇيسىكتى دامىتۋعا اسەرى تۋرالى ايتىپ، ءوزىنىڭ اقىندىق جولىنداعى جەتىستىكتەرى مەن كەزدەسكەن قيىندىقتارى جونىندە وي ءبولىستى. سونىمەن قاتار، جاستارعا قازاق ادەبيەتىنە قىزىعۋشىلىق تانىتىپ، ۇلتتىق مادەنيەتتى باعالاۋعا جانە دامىتۋعا شاقىردى.
جيىندا جاستار رەسۋرستىق ورتالىعىنىڭ «باق پەن قوعاممەن بايلانىس» ءبولىمىنىڭ باسشىسى اقتورە قايرات مودەراتورلىق ەتتى.
تۇركىستان وبلىسى قوعامدىق دامۋ باسقارماسى «جاستار رەسۋرستىق ورتالىعى» كمم-ءنىڭ ۇيىمداستىرۋىمەن وتكەن كەزدەسۋ ماقساتى – وزدەرىنىڭ ومىرلىك جانە كاسىبي تاجىريبەلەرىمەن ءبولىسۋ ارقىلى جاستاردى ىنتالاندىرۋ، شىعارماشىلىققا شابىت بەرۋ جانە بولاشاققا دەگەن سەنىمدەرىن نىعايتۋ.
ايتا كەتەيىك، «BASTAU TALKS» قوعامدىق لەكتسياسى – جاستار ءۇشىن ەرەكشە مۇمكىندىك. بۇل جوبا ءار ءتۇرلى سالادا جەتىستىككە جەتكەن كاسىبي مامانداردى، تالانتتى جاستاردى جانە بەلسەندى قوعام قايراتكەرلەرىن جيناپ، جاستاردىڭ ءبىلىم مەن تاجىريبە الماسۋىنا مۇمكىندىك جاساۋ. ولاردىڭ ومىرلىك تاجىريبەسى مەن جەتىستىككە جەتۋ جولىن جاستارعا ۇلگى ەتە وتىرىپ، موتيۆاتسيا بەرىپ، دامىتۋ، تىڭ اقپارات الۋعا باعىتتالعان.
