قازاقستان پرەزيدەنتى مەن قىتاي توراعاسىنىڭ كەلىسسوزى ناتيجەسىندە ون ماڭىزدى قۇجات قابىلداندى
قازاقستان پرەزيدەنتى قاسىم-جومارت توقاەۆ قحر توراعاسى سي تسزينپينمەن كەلىسسوزدەر جۇرگىزدى، دەپ حابارلايدى اقوردانىڭ رەسمي سايتى.
كەزدەسۋ بارىسىندا توقاەۆ قىتاي كوشباسشىسىمەن بىشكەكتە وتكەن شىۇ سامميتىنەن كەيىن اراعا بىرنەشە اي سالىپ قايتا جولىققانىنا وتە قۋانىشتى ەكەنىن ايتتى. مەملەكەت باسشىسى قىتاي توراعاسىنا قوناقجايلىق كورسەتكەنى ءۇشىن ريزاشىلىق ءبىلدىرىپ، سي ءتسزينپيننىڭ دوسى، قازاقستاننىڭ تۇڭعىش پرەزيدەنتى نۇرسۇلتان نازارباەۆتىڭ سالەمى مەن ىستىق ىقىلاسىن جەتكىزدى.
ء"بىزدىڭ كەزدەسۋىمىز قحر-نىڭ 70 جىلدىق مەرەيتويى قارساڭىندا ءوتىپ وتىر. وسى ءساتتى پايدالانىپ، ءسىزدى جانە تۇتاس قىتاي حالقىن ايتۋلى داتامەن قۇتتىقتاعىم كەلەدى. قىتاي بۇل مەرەيتويعا الەۋمەتتىك-ەكونوميكالىق جانە ساياسي دامۋ تۇرعىسىنان زور جەتىستىكپەن جەتىپ وتىر. وسى وقيعا تەك قىتاي حالىق رەسپۋبليكاسى ءۇشىن عانا ەمەس، كۇللى الەم ءۇشىن تاريحي مانگە يە دەپ ويلايمىن. ءسىزدىڭ مەملەكەتتىڭىزدىڭ دامۋى دۇنيە ءجۇزىنىڭ ءجىتى نازارىندا،– دەدى توقاەۆ.
مەملەكەت باسشىسىنىڭ ايتۋىنشا، وسى جەتپىس جىلدىق جول قىتاي ءۇشىن وتە اۋىر بولدى. بىراق 1970 جىلداردىڭ سوڭىندا دەن ءسياوپيننىڭ باسشىلىعىمەن قولعا الىنعان رەفورمالاردىڭ ارقاسىندا قىتاي حالقى ءوز دامۋىندا وراسان زور جەتىستىككە جەتتى.
"قىتايدىڭ تابىستارى مەملەكەتتەرىمىز اراسىنداعى ىنتىماقتاستىقتى دامىتۋ ءۇشىن بەرىك نەگىز بولادى دەپ سانايمىز. بۇگىن ءبىز بىرلەسكەن مالىمدەمەگە قول قويامىز. بۇل قۇجات بويىنشا قازاقستان مەن قىتاي ۇزاقمەرزىمدى، ستراتەگيالىق جانە جان-جاقتى سەرىكتەستىكتى دامىتۋعا بەيىلدى ەكەنىن كورسەتەدى. جوعارى دەڭگەيدە قول جەتكىزگەن ۋاعدالاستىق ەكى ەل اراسىنداعى ىنتىماقتاستىقتى ودان ءارى دامىتۋ ءۇشىن سالماقتى قۇقىقتىق جانە ساياسي بازا بولىپ تابىلادى", – دەدى قازاقستان پرەزيدەنتى.
سي تسزينپين ءوز سوزىندە قازاقستاننىڭ ورتا ازياداعى ءىرى ەل ءارى ورتالىق ەۋرازيادا ۇلكەن ىقپالى بار ەكەنىن ايتتى.
"قازاقستاننىڭ تۇڭعىش پرەزيدەنتى نۇرسۇلتان نازارباەۆتىڭ باسشىلىعىمەن ەلدەرىڭىز زور تابىسقا قول جەتكىزدى، ۇلتتىق ەرەكشەلىككە نەگىزدەلگەن دامۋ ۇلگىسىن قۇردى. ءسىز پرەزيدەنت بولعاننان كەيىن ءوزىڭىزدىڭ ساباقتاستىق، ادىلەتتىلىك جانە ىلگەرىلەۋ جونىندەگى ءۇش ۇستانىمىڭىزدى جاريالادىڭىز. ەكونوميكانى دامىتۋدى، جۇمىس ورىندارىن اشۋدى، سىبايلاس جەمقورلىقپەن كۇرەسۋدى، الەۋمەتتىك قورعاۋ دەڭگەيىن كوتەرۋدى الدىڭىزعا ماقسات ەتىپ قويدىڭىز. بۇل قازاقستان حالقىنىڭ ءۇمىتىن اقتايدى. سىزدىڭ بارلىق باستاماڭىز وسىعان باعىتتالعان. دوستاس قازاقستان حالقىنا باق-بەرەكە جانە تابىس تىلەيمىن، – دەدى قىتاي كوشباسشىسى.
توقاەۆ پەن سي ءتسزينپيننىڭ كەلىسسوزدەر قورىتىندىسى بويىنشا مىناداي قۇجاتتارعا قول قويىلدى:
- مەملەكەتتەر باسشىلارىنىڭ بىرلەسكەن مالىمدەمەسى;
- قازاقستان ۇكىمەتى مەن قحر ۇكىمەتىنىڭ اراسىنداعى اۆياتسيالىق ىزدەۋ جانە ازاماتتىق اۋە كەمەلەرىن قۇتقارۋ سالاسىنداعى ىنتىماقتاستىق تۋرالى كەلىسىم;
- قازاقستان ۇكىمەتى مەن قحر ۇكىمەتىنىڭ اراسىنداعى "نۇرلى جول" جاڭا ەكونوميكالىق ساياساتى (نج جەس) مەن "جىبەك جولىنىڭ ەكونوميكالىق بەلدەۋى" (ججەب) قۇرىلىسىن ۇشتاستىرۋ جونىندەگى ىنتىماقتاستىق جوسپارىن جۇزەگە اسىرۋعا بايلانىستى ءوزارا كومەك تۋرالى مەموراندۋم;
- قازاقستان ۇكىمەتى مەن قحر ۇكىمەتىنىڭ اراسىنداعى قىتاي ۇكىمەتىنىڭ قازاقستان تاراپىنا سۋپەركومپيۋتەر بەرۋ جوباسى جونىندەگى ىنتىماقتاستىق تۋرالى كەلىسىم;
- قازاقستاننىڭ ساۋدا جانە ينتەگراتسيا مينيسترلىگى مەن قحر كوممەرتسيا مينيسترلىگى اراسىنداعى ءوزارا تۇسىنىستىك تۋرالى مەموراندۋم;
- قازاقستاننىڭ اۋىل شارۋاشىلىعى مينيسترلىگى مەن قحر باس كەدەن باسقارماسى اراسىنداعى قىتايعا قازاقستاننان ەكسپورتتالاتىن ءسۇت ونىمدەرىنە قويىلاتىن ينسپەكتسيالىق، كارانتيندىك جانە ۆەتەرينارلىق-سانيتارلىق تالاپتار جونىندەگى حاتتاما;
- قازاقستاننىڭ اۋىل شارۋاشىلىعى مينيسترلىگى مەن قحر باس كەدەن باسقارماسى اراسىنداعى قىتايعا قازاقستاننان ەكسپورتتالاتىن ءجۇن شيكىزاتىنا قويىلاتىن ينسپەكتسيالىق، كارانتيندىك جانە ۆەتەرينارلىق-سانيتارلىق تالاپتار جونىندەگى حاتتاما;
- قازاقستاننىڭ قارجى مينيسترلىگى مەن قحر باس كەدەن باسقارماسى اراسىنداعى ينتەللەكتۋالدى مەنشىك قۇقىعىن شەكارا ماڭىندا قورعاۋ سالاسىنداعى ىنتىماقتاستىقتى نىعايتۋ جونىندەگى مەموراندۋم;
- قازاقستاننىڭ اۋىل شارۋاشىلىعى مينيسترلىگى مەن ققحر باس كەدەن باسقارماسى اراسىنداعى قىتايعا قازاقستاننان ەكسپورتتالاتىن زىعىرعا قويىلاتىن ينسپەكتسيالىق، كارانتيندىك جانە ۆەتەرينارلىق-سانيتارلىق تالاپتار جونىندەگى حاتتاما;
- قازاقستان مەن قىتاي اراسىنداعى كەدەن شەكاراسى ارقىلى تاۋارلار مەن كولىكتەردى الىپ ءوتۋ تۋرالى الدىن الا اقپارات الماسۋ جونىندەگى تەحنيكالىق سپەتسيفيكاتسيا.
Sputnik.
