مەكتەپ دارەتحاناسىندا وقۋشىنى ولتىرگەن ءۇش جاسوسپىرىمگە ۇكىم شىقتى

جامبىل وبلىسى كامەلەتكە تولماعانداردىڭ ىستەرى جونىندەگى مامانداندىرىلعان اۋدانارالىق سوتى 14 قاڭتاردا بۇزاقىلىق جانە الدىن الا ءسوز بايلاسۋ ارقىلى توپ بولىپ، دەنساۋلىققا قاساقانا اۋىر زيان كەلتىرىپ، ادامنىڭ ولتىرگەن ءۇش كامەلەتكە تولماعان جاسوسپىرىمگە قاتىستى ءىستى قارادى، دەپ حابارلايدى "ادىرنا" ۇلتتىق پورتالى.  سوتتىڭ دەرەكتەرىنە سۇيەنسەك، بايزاق اۋدانى قۇمجوتا اۋىلىنىڭ جاسوسپىرىمدەرى مەكتەپ دارەتحاناسىندا الدىن الا ءسوز بايلاسىپ، 8-سىنىپ وقۋشىلارىنان وزدەرىنە باعىنۋدى تالاپ ەتىپ، قورقىتىپ، ۇرىپ-سوققان. وقيعا بارىسىندا وقۋشىلاردىڭ ءبىرى كەۋدە تۇسىنان سوققى الىپ، سول جەردە كوز جۇمعان. سوت ەكى وقۋشىنى 6 جىل 8 ايعا باس بوستاندىعىنان ايىرۋ تۋرالى، ءبىر وقۋشىنى 1 جىلعى باس بوستاندىعىنان شەكتەۋ جازاسىن تاعايىندادى. سوتتالعانداردان پروتسەسسۋالدىق شىعىندار، مورالدىق شىعىن رەتىندە 6 ملن جانە 5 ملن تەڭگە كولەمىندە وتەماقى جانە جابىرلەنۋشىلەر قورىنا تولەمدەر ءوندىرىلدى. ۇكىم ءالى زاڭدى كۇشىنە ەنگەن جوق.