يراكتا توعىز جاستاعى قىزدارعا ۇيلەنۋگە رۇقسات بەرىلمەك

يراك پارلامەنتى بالالار نەكەسىن زاڭداستىراتىن جەكە مارتەبە تۋرالى زاڭعا تۇزەتۋلەر ەنگىزۋدى ماقۇلدادى، دەپ حابارلايدى "ادىرنا" ۇلتتىق پورتالى CNN-گە سىلتەمە جاساپ.  بۇل تۇزەتۋلەر 1959 جىلى قابىلدانعان جانە ايەلدەردىڭ وتباسىلىق قۇقىقتارىن قورعاۋدى قامتاماسىز ەتەتىن زاڭعا قاتىستى وزگەرىستەردى قامتيدى. جاڭا ەنگىزىلىمدەر يسلام سوتتارىنىڭ نەكەگە تۇرۋ، اجىراسۋ جانە مۇراگەرلىك ماسەلەلەرىندەگى وكىلەتتىگىن كۇشەيتەدى. تۇزەتۋلەردى كونسەرۆاتيۆتى شيت دەپۋتاتتارى ۇسىنعان. ولار بۇل وزگەرىستەر يسلام قاعيداتتارىنا سايكەستەندىرۋگە جانە يراكتاعى باتىس مادەنيەتىنىڭ ىقپالىن ازايتۋعا مۇمكىندىك بەرەدى دەپ سانايدى. Human Rights Watch قۇقىق قورعاۋ ۇيىمى بۇل زاڭ جوباسىنا قارسى شىعىپ، تامىز ايىندا جاريالانعان بايانداماسىندا بۇل تۇزەتۋلەردى قاتتى سىنعا الىپ، ولاردىڭ قابىلدانباۋى كەرەكتىگىن ەسكەرتتى. «ەگەر تۇزەتۋلەر قابىلدانسا، ول حالىقارالىق زاڭدارعا سايكەس ايەلدەر مەن قىزداردىڭ قۇقىقتارىنا اۋىر سوققى بولادى. بۇل زاڭ 9 جاستان باستاپ قىزداردى نەكەگە تۇرعىزۋعا رۇقسات بەرەدى. يراك زاڭدارىندا بەكىتىلگەن تەڭدىك قاعيداتىن بۇزادى جانە ايەلدەردى اجىراسۋ مەن مۇراگەرلىك ماسەلەلەرىندە قورعايتىن تەتىكتەردەن ايىرادى. بالالار نەكەسى قىزداردى سەكسۋالدىق جانە فيزيكالىق زورلىق-زومبىلىق قاۋپىنە، ءبىلىم مەن جۇمىس مۇمكىندىگىنەن ايىرىلۋعا دۋشار ەتەدى» - دەدى ۇيىم وكىلدەرى. ۇيىمنىڭ يراك ماسەلەلەرى بويىنشا زەرتتەۋشىسى سارا سۋنبار بالالار نەكەسىن زاڭداستىرۋ كوپتەگەن قىزداردى ءوز بولاشاعىنان ايىرىپ، ولاردىڭ ءال-اۋقاتىنا زيانىن تيگىزەتىنىن ايتتى. "قىز بالالارى توي كويلەگىندە ەمەس، مەكتەپتە جانە ويىن الاڭىندا بولۋى كەرەك", – دەدى ول.