اقتاۋ ماڭىنداعى اۋە اپاتىنىڭ ناتيجەلەرى كەلەسى اپتادا جاريالانۋى ءتيىس. بۇل تۋرالى قر پرەمەر-ءمينيسترىنىڭ ورىنباسارى قانات بوزىمباەۆ مالىمدەدى، دەپ حابارلايدى “ادىرنا” ۇلتتىق پورتالى.
«تەرگەۋ جالعاسۋدا. حالىقارالىق ازاماتتىق اۆياتسيا ۇيىمىنىڭ ستاندارتتارى بويىنشا، ءبىر اي ىشىندە تەرگەۋدىڭ الدىن الا ناتيجەلەرى جاريالانۋى كەرەك. بۇل قىلمىستىق تەرگەۋ ەمەس، اۆياتسيالىق وقيعانى اۆياتسيالىق بيلىك تاراپىنان تەرگەۋ تۋرالى ءسوز بولىپ وتىر. (…) ءبىز كەلەسى اپتادا بۇل تەرگەۋدىڭ الدىن الا قورىتىندى بولىگىن كورەمىز دەپ ۇمىتتەنەمىز»، - دەدى بوزىمباەۆ ۇكىمەتتەگى بريفينگتە.
ول 17-18 ادامنان تۇراتىن كوميسسيا قازىر تەرگەۋ ماتەريالدارىمەن جۇمىس ىستەپ جاتقانىن جانە وعان رەسەي، ازەربايجان مەن يكاو ماماندارىنىڭ قاتىسىپ جاتقانىن ايتتى.
«قازىر ولار ۇشاقتىڭ قارا جاشىكتەرىنىڭ دەرەكتەرىن زەرتتەۋمەن اينالىسۋدا، ولار برازيليادا تولىقتاي دەشيفرلەندى: ۇشۋ پارامەترلەرى مەن رەجيمدەرى، جەرمەن جانە ەكيپاج اراسىندا جۇرگىزىلگەن كەلىسسوزدەر. بۇل دەرەكتەر سالىستىرىلىپ، قورىتىندىلار جاسالادى. بۇل ۇلكەن حالىقارالىق جۇمىس»، - دەپ ءتۇسىندىردى بوزىمباەۆ.
سونىمەن قاتار، ول قارا جاشىكتەردىڭ دەرەكتەرىنىڭ تاراپ كەتۋىنە قاتىستى پىكىر ءبىلدىردى.
«مەنىڭ ويىمشا، بۇل كوبىنەسە جەرمەن جۇرگىزىلگەن كەلىسسوزدەر. ەكيپاجدىڭ سويلەسۋلەرى تۋرالى ەستىمەدىم. قارا جاشىكتە بارلىق كەلىسسوزدەر ساقتالعان. سوندىقتان مەن ونى دەرەكتەردىڭ تاراپ كەتۋى دەپ سانامايمىن»، - دەدى بوزىمباەۆ.
ەسكە سالساق، 2024 جىلى 25 جەلتوقساندا ازەربايجان استاناسى باكۋدان شەشەنستان ورتالىعى گروزنىيعا ۇشىپ شىققان Azerbaijan Airlines اۋەكومپانياسىنىڭ Embraer E190 ۇشاعى اقتاۋ قالاسى ماڭىندا اپاتقا ۇشىراعان بولاتىن. بورتتاعى 67 ادامنىڭ 38-ءى قازا تاپقان ەدى.
بولجام بويىنشا، گروزنىي اۋە كەڭىستىگىندە ۇشاق رەسەيلىك اۋە قورعانىس جۇيەسىنىڭ شابۋىلىنا ۇشىراعاننان كەيىن باعىتىن وزگەرتۋگە ءماجبۇر بولعان، وسىلايشا قازاقستاندا اپاتقا ۇشىراعان. ازەربايجان پرەزيدەنتى يلحام اليەۆ اپاتقا رەسەي وكىلدەرى كىنالى دەپ مالىمدەپ، ماسكەۋ وتەماقى تولەۋى كەرەك دەگەن تالاپ قويدى.
كەيىن رەسەي پرەزيدەنتى ۆلاديمير پۋتين اليەۆكە ۇشاق «رەسەيدىڭ اۋە كەڭىستىگىندە اپاتقا ۇشىراعانى ءۇشىن» كەشىرىم سۇرادى. رەسەي بيلىگى ازەربايجان ۇشاعى گروزنىيعا قونباق بولعان كەزدە ۋكراينالىق دروندارعا بايلانىستى قالا توبەسىندە اۋە قورعانىس جۇيەسى ىسكە قوسىلىپ تۇرعانىن مويىنداعان.
قازاقستاندا اپات بويىنشا ۇكىمەتتىك كوميسسيا قۇرىلعان.
31 جەلتوقساندا قازاقستاننىڭ دەنساۋلىق ساقتاۋ مينيسترلىگى بارلىق قالعان ازەربايجان ازاماتتارىن اقتاۋداعى اۋە اپاتىنان كەيىن تۋعان ەلدەرىنە جەتكىزگەنىن مالىمدەدى.
4 قاڭتاردا برازيليا تەرگەۋشىلەرى اقتاۋ ماڭىنداعى اپاتقا ۇشىراعان ۇشاقتىڭ قارا جاشىكتەرىنىڭ دەرەكتەرىن زەرتتەي باستاعانى تۋرالى حابارلاندى.
6 قاڭتاردا ازەربايجان پرەزيدەنتى يلحام اليەۆ قازاقستان پرەزيدەنتى توقاەۆقا ۇشاق اپاتىنا بايلانىستى ازەربايجان ازاماتتارىنىڭ قايتىس بولۋىنا رەسەي فەدەراتسياسىنىڭ وكىلدەرى كىنالى ەكەنىن ايتتى.
7 قاڭتاردا برازيليادا قارا جاشىكتەردىڭ دەرەكتەرىن زەرتتەۋ اياقتالعانى تۋرالى حابارلاندى، ال قازاقستان كولىك مينيسترلىگى اقتاۋ ماڭىنداعى اۋە اپاتىنا قاتىستى دەرەكتەردى زەرتتەۋدى جاقىن ارادا استانادا باستايتىنىن مالىمدەدى.
بۇعان دەيىن “ادىرنا” ۇلتتىق پورتالى اقتاۋ ماڭىنداعى ۇشاق اپاتىن تەرگەۋ بارىسىندا شىندىقتى انىقتاپ، كىنالىلەردى جازالاۋدان گورى، ماسەلەنى ماعىناسىز تالاسقا بۇرۋ ارەكەتى ايقىن بايقالۋدا ەكەنىن جازدى. ال بارلىق مۇددەلى تاراپ قازاقستاننان برازيليادا جۇرگىزىلگەن قارا جاشىكتىڭ دەرەكتەرىن زەرتتەۋ نەگىزىندە ازەربايجان ۇشاعىنىڭ اپاتقا ۇشىراۋىنىڭ تەرگەۋ قورىتىندىلارىن كۇتىپ وتىر.
