اقش ۆيتسە-پرەزيدەنتى دجەي دي ۆەنس امەريكا اسكەرىن ۋكرايناعا جىبەرۋ مۇمكىندىگىن جوققا شىعاردى. بۇل تۋرالى ول 14 اقپان كۇنى الەۋمەتتىك جەلىدە جازدى، دەپ حابارلايدى “ادىرنا” ۇلتتىق پورتالى.
“پرەزيدەنت ترامپ - الەمدەگى ەڭ ۇلكەن كەلىسىم جاساۋشى جانە ول ۋكرايناداعى سوعىستى توقتاتۋ ارقىلى ايماققا بەيبىتشىلىك اكەلەدى. ءبىز ءاردايىم ايتقانىمىزداي، امەريكا اسكەرلەرى ەشقاشان امەريكالىق مۇددەلەر مەن قاۋىپسىزدىككە ۇلەس قوسپايتىن جەرلەردە قاۋىپكە ۇشىراماۋى ءتيىس. بۇل سوعىس رەسەي مەن ۋكراينا اراسىندا ءجۇرىپ جاتىر»، – دەدى دجەي دي ۆەنس.
سونىمەن، ۆەنس The Wall Street Journal (WSJ) باسىلىمىندا جاريالانعان سۇحباتىن جوققا شىعاردى. وندا ول ەگەر رەسەي ۋكراينامەن بەيبىت كەلىسىم جاساۋعا كەلىسپەسە، اقش ماسكەۋگە قارسى جاڭا سانكتسيالار ەنگىزىپ، ءتىپتى امەريكالىق اسكەردى ۋكرايناعا جىبەرۋى مۇمكىن ەكەندىگى ايتىلعان ەدى. WSJ جۋرناليستەرى ۆەنستىڭ «رەسەيگە قارسى ەكونوميكالىق جانە اسكەري ىقپال ەتۋ قۇرالدارى بار» دەگەن سوزدەرىن كەلتىرگەن.
«WSJ مەنىڭ سوزدەرىمدى وسىلاي بۇرمالاپ جازعانى ابسۋرد، بىراق تاڭقالارلىق ەمەس، ويتكەنى ولار جىلدار بويى قاجەتسىز تۇردە امەريكالىق اسكەرلەردى شەتەلگە جىبەرۋدى قولدادى»، – دەپ جاۋاپ بەردى ۆەنس WSJ جاريالاعان ماقالاعدا.
امەريكالىق ۆيتسە-پرەزيدەنتتىڭ ايتۋىنشا، اقش بيلىگى ۆلاديمير ءپۋتيندى رەسەي ۇرىس دالاسىنان گورى كەلىسسوز ۇستەلىندە كوپ نارسەگە قول جەتكىزە الاتىنىنا سەندىرۋدى كوزدەپ وتىر. ۆەنس سونداي-اق بەيبىت كەلىسسوزدەر ءساتتى وتكەن جاعدايدا ۆاشينگتون مەن ماسكەۋ اراسىنداعى قارىم-قاتىناس قايتا قالپىنا كەلۋى مۇمكىن ەكەنىن ايتتى.
ساياساتكەر بۇعان دەيىن اقش پرەزيدەنتى دونالد ترامپ جاريالاعان ۋكرايناداعى قاقتىعىستاردى توقتاتۋ تۋرالى جوسپارلانعان كەلىسىم «كوپتەگەن ادامدى تاڭ قالدىرادى» دەپ اتاپ ءوتتى. سونىمەن بىرگە ول كەلىسسوز بارىسىندا ترامپتىڭ بەلگىلى ءبىر ماسەلەلەر بويىنشا پىكىرىن وزگەرتۋى مۇمكىن ەكەنىن اتاپ ءوتتى.
ءبىر كۇن بۇرىن پەنتاگون باسشىسى پيت حەگسەت ۋكرايناعا امەريكالىق اسكەردى ورنالاستىرۋ مۇمكىندىگىن جوققا شىعاردى. ول سونداي-اق ۋكراينانى 2014 جىلعى شەكاراعا قايتارۋ شىندىققا جاناسپايتىن ماقسات ەكەنىن اتاپ ءوتتى.
