پوليتسيادان قاراپايىم حالىقتىڭ قۇقىعىن قورعاۋشى رەتىندە تانىلعان بلوگەر رۋسلان جانپەيىسوۆتىڭ تۇتقىندالعانى تۋرالى حابار الەۋمەتتىك جەلى ارقىلى تاراعان بولاتىن. پوليتسيا مەن ماي قىزمەتكەرلەرىنە قىرعيداي تيەتىن جانپەيىسوۆتىڭ قۇقىق قورعاۋ ورگانىنىڭ قىزمەتكەرلەرىنە "سوعىس اشىپ" جۇرگەنىنە دە 1-2 جىلدىڭ كولەمى بولدى. زاڭدى جەتىك بىلەتىن جانپەيىسوۆ زاڭ قىزمەتكەرلەرىنە قالاي تۇتىلدى ەكەن؟ اقپاراتتىڭ انىق-قانىعىن ءبىلۋ ماقساتىندا شىمكەنت قالالىق پوليتسيا باسقارماسىنا حابارلاسقانىمىزدا تومەندەگىدەي رەسمي جاۋاپ الدىق.
"اعىمداعى جىلدىڭ 18 ماۋسىمى شىمكەنت قالاسىنىڭ تۇرعىنى دەنە جاراقاتىن العانى ءۇشىن پوليتسياعا جۇگىندى.
اتالعان فاكتى ەردر-دە قازاقستان رەسپۋبليكاسىنىڭ قىلمىستىق كودەكسىنىڭ «بۇزاقىلىق» 3-بولىگىنىڭ 293 جانە «دەنساۋلىققا قاساقانا ورتاشا اۋىرلىقتاعى زيان كەلتىرۋ» 107-بابى 1-بولىگى بويىنشا تىركەلگەن.
سونداي-اق پوليتسيا قىزمەتكەرىن قىزمەتتىك مىندەتتەرىن ورىنداۋ كەزىندە قورلاۋ فاكتىسى بويىنشا قر قىلمىستىق كودەكسىنىڭ «بيلىك وكىلىن قورلاۋ» 2-بولىگىنىڭ 378-بابى بويىنشا سوتقا دەيىنگى تەرگەۋ جۇرگىزىلۋدە.
قازىرگى ۋاقىتتا قىلمىسكەر شىمكەنت قالاسىنىڭ تەرگەۋ يزولياتورىنا قامالدى".
شىمكەنت ق. پب ءباسپاسوز قىزمەتى
شىمكەنتتىك بەلگىلى زاڭگەر ايگۇل ورىنبەك ءوزىنىڭ فەيسبۋك پاراقشاسىندا رۋسلاننىڭ تۇتقىندالعانىن راستاپ، جازبا قالدىرعان. وندا رۋسلاننىڭ ءوزى زاڭدى ۇيرەتىپ ءجۇرىپ ءوزىنىڭ دە ءجيى زاڭ بۇزاتىنىن ەسكەرتكەنىن ايتادى.
"رۋسلان جانپەيسوۆ ۇستالعانى راس پا؟- دەپ سۇراپ جاتقاندارعا ايتارىم، بۇل اقپارات راس! بەلسەندى بولعان دۇرىس، بىراق زاڭدى بۇزباي حالىققا ونەگە كورسەتۋ كەرەكسىڭ. بۇل جولدى تاڭدادىڭ با؟ زاڭمەن ءجۇرۋدى ۇيرەن! سەبەبى شىندىقتى ايتقان سايىن دۇشپانىڭ كوبەيەدى. ەلدىڭ قولداۋىن ءوز جەكە باسىنىڭ ماسەلەسىن شەشۋ ءۇشىن پايدالانۋدىڭ قاجەتى جوق! تەك زاڭگەر ەمەس، بەلسەندى رەتىندە وسى جولدا جۇرگەنىمە التى جىلداي ۋاقىت بولىپتى. كوپتەگەن بەلسەندىلەردى كوردىم. تەز تانىلىپ، تەز وشكەندەردى دە بىلەم. كەيبىر بەلسەندىلەر حالىقتىڭ قولداۋىن تابىس كوزىنە اينالدىرىپ، ەلدى بوپسالاپ، مەملەكەتتىك قىزمەتكەرلەرگە دورەكىلىك تانىتىپ جاتادى. حالىققا زاڭدى ۇيرەتىپ، وزدەرى زاڭدى ورەسكەل بۇزىپ جاتقانىن بايقاماي قالادى. رۋسلانعا مەن بىرنەشە رەت ەسكەرتكەم ۆيدەولارىڭدا كوپتەگەن قۇقىق بۇزۋشىلىقتار بار. تىنىش جۇرسەي، ءبارىن زاڭدى ىستەسەي دەپ. الايدا ينتەرنەت جۇلدىزى اۋرۋىمەن اۋىرعان ادامدى دۇرىس جولعا سالۋ قيىن ەكەن. وتكەندە قالا تۇرعىنىنا گاز شاشقان، سول كەزدىڭ وزىندە زاڭ بۇزعان. ول ازامات ارىزداندى ما، بىلمەيمىن. ودان ۇلتارازدىق قوزدىراتىن اڭگىمە ايتتى. پوليتسيا قىزمەتكەرىنە ء"ناتسيسسىڭ " دەگەن سىقىلدى. ول جەردە دە زاڭ بۇزۋشىلىق فاكتىلەرى بار بولاتىن. ال ەندى پوليتسيا قىزمەتكەرلەرىنە قول كوتەرۋ، بۇل بارىپ تۇرعان بۇزاقىلىق. بەلسەندى بولۋ زاڭدى ۇمىتۋ ەمەس، زاڭمەن ءجۇرىپ زاڭنىڭ ورىندالۋىن مادەنيەتى تۇردە تالاپ ەتۋ.
پوليتسيا قىزمەتكەرلەرىنە قاراپ تىكەلەي ەفيردە تۇرىپ، "تى چە تۋپوي"- دەپ ايتۋدىڭ ءوزى دۇرىس ەمەس! يا بەلسەندى بولىڭىزدار! بىراق قوعامدى جانە ۇلتتىڭ ءتىلىن سىيلاڭىزدار! بار ايتارىم وسى!" دەپ جازعان تانىمال زاڭگەر ءارى قوعام بەلسەندىسى.
الەۋمەتتىك جەلىنى تۇتىنۋشىلار پىكىرى بولسا ەكىگە جارىلدى. ءبىرى رۋسلاندى باتىر دەسە، ەكىنشىسى وزىنە سول كەرەك ەدى دەۋدە. قازاقشا سويلەگەن ماي قىزمەتكەرىنە "نەگە قازاقشا سويلەيسىڭ؟ ءناتسيسسىڭ بە؟" دەگەن ءسوزى رۋسلاننىڭ كوپتەگەن قولداۋشىلارىنا ۇناماي قالعان بولاتىن. ۇنەمى پوليتسيا قىزمەتكەرلەرىمەن تىرەسىپ، زاڭسىزدىقپەن كۇرەسىپ جۇرەتىن جانپەيىسوۆتىڭ بۇل ءبىرىنشى رەت تۇتقىندالۋى ەمەس.
ەستەرىڭىزگە سالا كەتەيىك، وسىدان ەكى جىل بۇرىن، 2017 جىلدىڭ ناۋرىزىندا پوليتسيامەن كۇرەسۋشى رەتىندە تانىمال رۋسلان جانپەيىسوۆ سوت زالىنان بوساتىلعاننان كەيىن ۆيدەو-حابارلاما جولداعان بولاتىن. بۇرىن پارا الدى دەپ ايىپتالعان رۋسلان تەرگەۋ يزولياتورىندا بولعان كەزدە ءوزىن قولداعان بارلىق ادامدارعا راحمەت ايتقان. جانپەيىسوۆ ءوز قولداۋشىلارىنان دەمالۋعا از ۋاقىت سۇراپ، سوسىن قايتادان ادىلەتتىلىك ءۇشىن كۇرەسىن جالعاستىرۋعا ۋادە بەرگەن بولاتىن.
"ادىرنا" ۇلتتىق پورتالى
