دۋبليندە موڭعول كورشىلەرىممەن پاتەردى ءبولىسىپ تۇرامىز. وسىندا 5 مىڭ موڭعول بار. ءتىرى موڭعولمەن بەتپە بەت جاقىن ارالاسۋىم وسى ەكەن. باسىندا قالالىق مادەنيەتكە ونشا-مۇنشا كەلىڭكىرەمەيتىن دۇڭك مىنەزدەرىن كورىپ شوشىپ، ونشا جۋىعىم كەلمەگەن.
ياعني، ۇناماي تۇرسا ۇناتپايدى، مايموڭكەلەمەيدى. كىشكەنە جۋاسىپ سويلەسە قايتەدى ەكەن دەگەنىم عوي. بىراق نيەتىڭ تازا ەكەنىن بىلسە قولىنداعى بارىن بەرەتىن قىزىق حالىق. ءبىر كۇنى تاڭعى اس، ءبىر كۇنى كەشكى اس اكەپ تۇرادى. كۇن سۋىتىپ كەتتى دەپ قالىڭ جەمپىر سىيلايدى. بۇگىن ۇلتتىق مەرەكەلەرىنە وراي “اجەم ءپىسىردى” دەپ نان مەن قۇرتىن ءۇيىپ اكەپتى. ءدام تات دەگەنى. كوشپەندى حالىق بولعان سوڭ ناندى وڭايشىلىقپەن كوگەرمەيتىندەي ەتىپ پىسىرگەن، پەشتەن جاڭا شىققان ەمەس كەبەجەدەن شىققان ءدام بار
قۇرت-نانىن ارالاستىرا تاباق تارتقان مادەنيەتىنە قاراڭىز، تازا كوشپەۋي. ءتاتتى قۇرتى، اشتى قۇرتى ارالاسىپ جاتىر. قالا حالقىنا ۇقساعىسى كەلەتىن سابەتتىك تىراشتانۋ، ساندەۋ جوق. ءبۋدديزمدى ۇستانعانىمەن، ءومىر سالتى، سەزىنۋى باياعى تاڭىرلىك سەنىممەن قالعانداي كورىندى. ەشكىمگە ەلىكتەمەيدى، تايپاق كەلگەن بويلارىمەن “موڭعولمىز” دەپ قاراپ تۇرادى. بىردە ورىس، بىردە اراب، بىردە كوسموپوليت، ايتەۋىر ءبارى بولعىسى كەلەتىن، بىراق قازاق بولعىسى كەلمەيتىن ءوزىمىزدى ويلاپ، مۇڭايىپ قۇرت قاجاپ وتىرمىن. ايتپاقشى ءبىزدىڭ قىزىل سيىرلار ەمەس، وسى قۇرتتار قوداستىڭ سۇتىنەن جاسالعان-اۋ.
جاھاندانۋ جاعدايىندا مادەنيەتتەر بىركەلكىلەنىپ بارا جاتىر دەيمىز. بىراق سونىڭ وسى كىسىلەرگە قاتىسى از با دەدىم. سوۆەتتىك وتارلانۋعا تۇسپەگەندە، يسلامنىڭ ىقپالى كۇشەيمەگەندە شىركىن، ءبىز قالاي بولار ەدىك؟! وسىلارعا قاراپ 100 الدە 200 جىل بۇرىنعى وتكەن شاعىمىزدى ەلەستەتىپ وتىرمىن. قول قۋسىرىپ وتىرماي، ەلدەن اكەلگەن سارى قازىمدى ورتاعا ءبىر اسىپ، مەيماندوس قازاق ەكەنىمدى ءبىر كورسەتسەم بە دەپ قويام...
قۇرمەتپەن، ءوزى بولۋدان ۇيالاتىن ۇلتتىڭ وكىلى.
Aya Omirtay
