قازاقستاندىق مانەرلەپ سىرعاناۋشى ميحايل شايدوروۆ 2025 جىلى بوستوندا وتكەن الەم چەمپيوناتىندا كۇمىس جۇلدە يەلەندى، دەپ حابارلايدى «ادىرنا» ۇلتتىق پورتالى.
جارىستىڭ سوڭعى باعدارلاماسى – ەركىن باعدارلامادا ەرلەر اراسىنداعى جەكە سىرعاناۋشىلار ونەر كورسەتتى. قىسقا باعدارلامادان كەيىن شايدوروۆ ءۇشىنشى ورىندا تۇردى، ال ەكىنشى جارىس كۇنىنىڭ قورىتىندىسى بويىنشا ءوز ناتيجەسىن جاقسارتىپ، جوعارى كوتەرىلدى.
ەركىن باعدارلامادا قازاقستاندىق سپورتشى 192,70 ۇپاي جيناپ، بۇل ونىڭ جەكە رەكوردى بولدى. سونداي-اق، جالپى ەسەپتەگى كورسەتكىشىن جاڭارتىپ، 287,47 ۇپايعا قول جەتكىزدى.
بۇل ناتيجە 20 جاستاعى شايدوروۆقا الەم چەمپيوناتىندا العاش رەت كۇمىس مەدال جەڭىپ الۋعا مۇمكىندىك بەردى. ول تەك امەريكالىق يليا مالينينگە (318,56) جول بەردى. ءۇشىنشى ورىندى جاپونيالىق يۋما كاگياما (278,19) يەلەندى.
وسى جەتىستىگىنىڭ ارقاسىندا شايدوروۆ 2026 جىلعى قىسقى وليمپياداعا جولداما الدى. بۇعان دەيىن ليتسەنزيانى ايەلدەر اراسىنداعى جارىستا 14-ورىن العان سوفيا سامودەلكينا دا يەلەنگەن بولاتىن.
شايدوروۆ الەم چەمپيوناتىنىڭ تۇعىرىنان كورىنگەن قازاقستان تاريحىنداعى ءۇشىنشى مانەرلەپ سىرعاناۋشى اتاندى. بۇعان دەيىن بۇل جەتىستىككە دەنيس تەن (2013 جىلى كۇمىس، 2015 جىلى قولا) جانە ەليزابەت تۇرسىنباەۆا (2019 جىلى كۇمىس) جەتكەن ەدى.
باسقا ماتەريالدار
Adyrna.kz ۇلتتىق پورتالىنىڭ ماڭىزدى اقپاراتتارىنا جازىلۋ
سوڭعى جاڭالىقتار تۋرالى حاباردار بولىڭىز