كەمبريجد ۋنيۆەرسيتەتىنىڭ عالىمدارى K2-18b ەكزوپلانەتاسىندا تىرشىلىك بولۋى مۇمكىن دەگەن شەشىمگە كەلدى. بۇل تۋرالى ماقالا The Astrophysical Journal Letters باسىلىمىندا جاريالاندى، دەپ حابارلايدى “ادىرنا” ۇلتتىق پورتالى.
عالىمدار «دجەيمس ۋەبب» تەلەسكوپىمەن ەكزوپلانەتاسىنا ۇڭىلگەندە جەر بەتىندەگى ءتىرى اعزالار شىعاراتىن ديمەتيلسۋلفيد پەن ديمەتيلديسۋلفيدتى گازىن انىقتاعان. بۇل گاز كوپ بولعاندىقتان «K2-18b ەكزوپلانەتاسىندا تىرشىلىك قايناپ جاتىر» دەگەن تۇجىرىم بار.
عالىمدار K2-18b ەكزوپلانەتاسىن «سۋپەر جەر» دەپ اتايدى. سەبەبى ونىڭ كولەمى جەردەن ەكى جارىم ەسەگە ۇلكەن. ءارى جەردەن 11 ترلن كم جەردە جاتىر. قازىر ادامزاتتا بۇل قاشىقتىقتى ەڭسەرەر ۇشاق يا راكەتا جوق.
عالىمدار DMS جانە DMDS ىزدەرى K2-18b اتموسفەراسىندا «بەلگىسىز حيميالىق پروتسەستىڭ» ناتيجەسىندە دە پايدا بولۋى مۇمكىن ەكەنىن جوققا شىعارمايدى. بۇل ورگانيكالىق قوسىلىستاردىڭ كۇن جۇيەسىنەن تىس كەزدەيسوق پايدا بولۋ ىقتيمالدىعى 0,3% قۇرايدى، الايدا عىلىمي جاڭالىق رەتىندە راستاۋ ءۇشىن بۇل كورسەتكىش 0,00006%-دان تومەن بولۋى كەرەك.
«قازىر بۇل بىزدە بار ەڭ سەنىمدى دالەل — ءبىر جەردە ءومىر بار بولۋى مۇمكىن. مەن بۇل دالەلدى ءبىر-ەكى جىل ىشىندە ناقتى راستاي الامىز دەپ شىنايى تۇردە ايتا الامىن»، – دەدى زەرتتەۋ جەتەكشىسى مادحۋسۋدحان BBC مەدياكومپانياسىنا بەرگەن سۇحباتىندا.
ونىڭ ايتۋىنشا، ەگەر K2-18b-دا تىرشىلىك بارى راستالسا، «ءبىز بۇل ارقىلى گالاكتيكامىزدا ءومىر كەڭ تارالعان دەگەندى ءىس جۇزىندە راستايمىز».
