ءۇش بالانىڭ اناسى بانۋ قۇلجاباەۆا ءبىر جارىم جاستاعى بالاسىنىڭ جارىلىستان كەيىن ۇزدىكسىز جوتەلىپ، ءىشى وتە باستاعانىن ايتادى. ول "جارىلىستان بەرى اۋىرماعان كۇنىمىز جوق" دەپ كەيىدى.
"اپتا سايىن اۋرۋحاناعا اپارام، اپتا سايىن باسقا ءدارى-دارمەك جازىپ بەرەدى. ودان ناتيجە بولماعان سوڭ تاعى بارامىز. ءسۇيتىپ كەلە جاتىرمىز. ءبىر جىل بۇرىن بالام رەانيماتسياعا وكپە اۋرۋىمەن تۇسكەن. ەندى سول اۋرۋى قايتا اسقىنىپ بارا جاتىر. ءىشى توقتاماي وتەدى. دارىگە دە توقتامايدى. جارىلىسقا دەيىن ونداي بولماعان. دارىگەرلەر دە تۇسىنبەي جاتىر. دياگنوز قويا الماي جاتىر" دەيدى بانۋ قۇلجاباەۆا.
قالا تۇرعىندارىنىڭ ءبىرى ايگۇل داۋلەتوۆانىڭ ايتۋىنشا، جارىلىستان سوڭ بالالارىنىڭ دەنەسىنە جارا شىعىپ، مۇرنى قانايتىن بولعان. ول ءدارى-دارمەك الۋعا قالتاسى كوتەرمەيتىنىن ايتىپ، ۇكىمەتتەن كومەك سۇرادى.
"جارىلىستان كەيىن قىزىمنىڭ دەنەسىنە جارا شىعىپ كەتتى. ءوز قالتامىزدان اقشا شىعارىپ، امالداپ جازىپ الدىق. "جارىلىستان سوڭ ەكولوگيا بۇزىلمادى" دەگەنگە سەنبەيمىز. ارىستىڭ ءاربىر وتباسىنا ۇكىمەتتەن وتەماقى تولەنسىن" دەدى ول.
كوپبالالى جالعىزباستى انا ايمان بازارباەۆا دا بەس بالاسىنىڭ دەنەسىنە جارا شىعىپ، قينالىپ جاتقانىن ايتتى. ونىڭ ايتۋىنشا، جاقىندا ارنايى كوميسسيا كەلىپ، تەكسەرىپ كەتكەن. ءۇش بالاسىنىڭ دەنەسىنە شىققان جارانىڭ بەتى قايتقانىمەن، ەكەۋىنىڭ جاراسى جازىلماعان.
"جالدامالى پاتەردە تۇرامىن. بەس بالامدى بىردەي ەمدەۋگە، ءدارى الۋعا شامام جوق. ۇكىمەتتەن الاتىن 21 مىڭ تەڭگەنى قايدا جەتكىزەمىن؟ پاتەردەن پاتەرگە تەنتىرەپ ءجۇرمىز. ەڭ بولماسا ەكولوگياعا وتەماقى بەرسە بولادى عوي" دەدى ول اشۋلانىپ.
اكىمدىك الدىنا جينالعان ايەلدەر بۇعان قوسا بىرنەشە ايدان بەرى جالعاسىپ كەلە جاتقان قۇرىلىس جۇمىستارىنىڭ ساپاسىنا كوڭىلى تولمايتىنىن ايتتى. ارىس تۇرعىنى بانۋ قۇلجاباەۆانىڭ ايتۋىنشا، "جارىلىستان جاڭا سالىنعان ءۇيىنىڭ ءىشى مەن سىرتىنا بىردەي جارىقشاق تۇسكەن، بىراق كوميسسيا ونى "جارىلىستان ءبۇلىندى" دەپ تانۋدان باس تارتقان".
"شتابتان كەلگەن كوميسسيا مۇشەلەرى مەنى مازاقتاپ، ۇرسىپ كەتتى. "تامعا جارىلىسقا دەيىن جارىقشاق تۇسكەن، ەسكى تام بولسا ءبىر ءجون" دەدى. بۇگىن اكىمدىكتە وسى ماسەلەنى ايتتىم" دەدى ول.
نارازى ءبىر توپ ايەلدى ارىس قالاسىنىڭ اكىمى قادىربەك مۇرات اكىمدىك زالىندا قابىلداعان. ايەلدەردىڭ ايتۋىنشا، اكىم ولارعا "ەكولوگيا ءۇشىن وتەماقى تولەنبەيتىنىن" ايتىپ تۇسىندىرگەن. ال قۇرىلىس جۇمىستارىنا كوڭىلى تولماعان ايەلدەرگە "جاقىن كۇندەرى ساراپتاما توبىن جىبەرەمىز، ەگەر جوندەۋ جۇمىستارى قاجەت بولسا، قۇرىلىسشىلاردى جىبەرەمىز" دەپ ايتقان.
جيىرماعا جۋىق ايەلدىڭ اكىمدىككە تالاپ قويىپ، نارازىلىق بىلدىرگەنىن قالالىق ىشكى ساياسات ءبولىمىنىڭ باسشىسى ايبول الىبەك راستادى. ونىڭ سوزىنشە، ارىس قالاسى ەكولوگيالىق ايماققا جاتادى. سوندىقتان "جۇمىس ىستەيتىن ازاماتتارعا عانا وتەماقى تولەنەدى". ونىڭ ايتۋىنشا، اكىمدىك الداعى ۋاقىتتا ايەلدەردىڭ ارىزىن تەكسەرەدى.
24 ماۋسىمدا ارىس قالاسىندا اسكەري قويما جارىلىپ، ءتورت ادام قازا تاپقان. رەسمي دەرەك بويىنشا، ونداعى وق-ءدارىنىڭ 70 پايىزدان استامى جارىلىپ كەتكەن. قالاداعى تۇرعىن ۇيلەردىڭ باسىم بولىگى بۇلىنگەن. بيلىك وكىلدەرى جارىلىستان بۇلىنگەن ۇيلەردى جوندەۋگە مەملەكەت كومەكتەسەدى دەپ ۋادە بەرگەن.
تۇركىستان وبلىستىق اكىمدىگى 9 قىركۇيەكتە قالادا 8600-دەن استام تۇرعىن ءۇي بارىن، 7 000-نان استام تۇرعىن جانە كوپقاباتتى ۇيلەردە قۇرىلىس جۇمىستارى اياقتالعانىن حابارلاعان. بۇعان دەيىن دە كەيبىر تۇرعىندار "قۇرىلىستىڭ باياۋ ءجۇرىپ جاتقانىن", "ساپاسىزدىعىن" ايتىپ شاعىمدانعان.
"ازاتتىق" راديوسى
