بۇگىن — بەلگىلى ساۋلەتشى، ەلتاڭبا مەن الماتىداعى تاۋەلسىزدىك مونۋمەنتىنىڭ اۆتورى، عالىم ءارى قوعام قايراتكەرى شوت-امان ءۋاليحانوۆتىڭ تۋعان كۇنى، دەپ حابارلايدى «ادىرنا» ءتىلشىسى.
شوت-امان (شوتا) ىدىرىسۇلى 1932 جىلى 26 ساۋىردە كوكشەتاۋ وڭىرىندەگى ايىرتاۋ اۋدانى، سىرىمبەت اۋىلىندا دۇنيەگە كەلگەن. ول — اتاقتى ابىلاي حاننىڭ ۇرپاعى.
1956 جىلى ماسكەۋدە ارحيتەكتۋرا ينستيتۋتىن بىتىرگەن سوڭ «كازگورسترويپروەكت» جوبالاۋ ينستيتۋتىندا ارحيتەكتور، كەيىن كسرو قۇرىلىس جانە ساۋلەت اكادەمياسىنىڭ قازاق فيليالىندا كىشى عىلىمي قىزمەتكەر، الماتى قالاسى باس ساۋلەتشىسىنىڭ ورىنباسارى، رەسپۋبليكالىق مادەنيەت جانە تاريحي ەسكەرتكىشتەردى قورعاۋ قوعامى توراعاسىنىڭ ءبىرىنشى ورىنباسارى، «كازگراجدانسەلپروەكتىنىڭ» باس ساۋلەتشىسى، 1973–1982 جىلدارى قازاقستان ساۋلەتشىلەر وداعىنىڭ توراعاسى، كسرو ساۋلەتشىلەر وداعى باسقارماسىنىڭ حاتشىسى، 1990–1995 جىلدارى م.اۋەزوۆ اتىنداعى ادەبيەت جانە ونەر ينستيتۋتىندا ونەر جانە ساۋلەت ءبولىمىنىڭ مەڭگەرۋشىسى بولعان.
ول 1999 جىلى الەۋمەتتىك عىلىمدار اكادەمياسىنىڭ اكادەميگى، ال 2001 جىلى حالىقارالىق شىعىس ەلدەرى ساۋلەت ونەرى اكادەمياسىنىڭ اكادەميگى، پروفەسسور اتاعىن الدى.
شوت-امان ءۋاليحانوۆ ەلىمىزدەگى كوپتەگەن عيماراتتىڭ، مونۋمەنتتىڭ جانە جيىرمادان استام ەسكەرتكىشتىڭ اۆتورى. ولاردىڭ قاتارىندا الماتىداعى "ۋنيۆەرسام" دۇكەنى، قازاقستان كومپارتياسى ورتالىق كوميتەتىنىڭ عيماراتى، "كازگيپروزەم" ءۇيى، شوقان ءۋاليحانوۆ، توقاش بوكين، اباي، عاني مۇراتباەۆ، ءالىبي جانگەلدين، احمەت بايتۇرسىنوۆ، كەنەسارى قاسىموۆ جانە تاعى باسقا ەسكەرتكىشتەر بار.
