بەندەر-ابباس قالاسىندا حالىقتىڭ دەنساۋلىعىنا تونگەن ەلەۋلى قاۋىپكە بايلانىستى توتەنشە جاعداي جاريالاندى. بيلىك 20 شاقىرىم راديۋستا زياندى زاتتاردىڭ تارالۋىنان قاۋىپتەنۋدە.
ءتۇنى بويى شاحيد رادجاي پورتىندا كونتەينەرلەردىڭ بىرىندە ساقتالعان حيميكاتتاردىڭ ورتەنۋىنەن شىققان ءورتتى سوندىرۋگە ارەكەت جاسالدى. باسىلىمنىڭ جازۋىنشا، كونتەينەردە زىمىراندارعا ارنالعان قاتتى وتىننىڭ نەگىزگى قۇرامداس بولىگى سانالاتىن ناتري پەرحلوراتىن جارىلعان.
وقيعا اقش پەن يران اراسىنداعى يادرولىق باعدارلاما بويىنشا ءۇشىنشى كەلىسسوزدەر كەزەڭىنىڭ ءوتىپ جاتقان كۇنى بولدى. جەرگىلىكتى بيلىك بۇل وقيعانى ديۆەرسيا نەمەسە ادەيى جاسالعان شابۋىل دەپ سانامايدى.
العاشىندا پورتتا جانارماي قويماسى جارىلدى دەگەن بولجام ايتىلعان ەدى. الايدا يراننىڭ ۇلتتىق مۇناي وڭدەۋ جانە تاراتۋ كومپانياسى بۇل اقپاراتتى جوققا شىعاردى.
يران ىشكى ىستەر مينيسترلىگىنىڭ سوڭعى مالىمەتتەرى بويىنشا، جارىلىس سالدارىنان 40 ادام قازا تاۋىپ، 1200-دەن استام ادام جاراقات العان.
زارداپ شەككەندەر اراسىندا قازاقستاندىقتار بار-جوعى ازىرگە حابارلانعان جوق.
قازىرگى تاڭدا قايعىلى وقيعا بويىنشا تەرگەۋ باستالدى. يران ۇكىمەتى شاحيد رادجاي پورتىندا بولعان جارىلىستان قازا تاپقاندارعا بايلانىستى 28 ءساۋىر، دۇيسەنبى كۇنىن جالپىۇلتتىق ازا تۇتۋ كۇنى دەپ جاريالادى.
